ԵՄ-ն եւ Հայաստանը պատրաստ են ''վերանայել և թարմացնել'' հարաբերությունների հիմքերը

Ուրբաթ օրը Վիլնյուսում կայանալիք գագաթաժողովի արդյունքում ստորագրվելիք հռչակագրի նախնական տեքստի`  Հայաստանին վերաբերող հատվածում, մասնավորապես, շեշտվում է Եվրամիության և Հայաստանի հարաբերությունների ներկայիս հիմքերը վերանայելու և թարմացնելու անհրաժեշտությունը:

«Ազատություն» ռադիոկայանի տրամադրության տակ հայտնված փաստաթղթում նշվում է, որ կողմերը «վերահաստատում են իրենց հաստատակամությունը՝ ավելի զարգացնել և խորացնել համագործակցությունը Արևելյան գործընկերության շրջանակներում փոխադարձ հետաքրքրություն ներկայացնող բոլոր ոլորտներում»:

Հռչակագրի նախնական տեքստում արտացոլվել է նաև Հայաստանի՝ անսպասելիորեն Եվրամիության հետ Ասոցացման համաձայնագրի և Խորը և համապարփակ ազատ առևտրի պայմանագրի կնքումից հրաժարվելու հանգամանքը: Փաստաթղթում, մասնավորապես, ասված է․  «Եվրոպական հարևանության քաղաքականության և Արևելյան գործընկերության շրջանակներում գագաթաժողովի մասնակիցները վերահաստատում են յուրաքանչյուր գործընկերոջ սուվերեն իրավունքը՝ ազատորեն ընտրելու Եվրամիության հետ հարաբերությունների իրենց համար ցանկալի մակարդակը և նպատակները»:

Հիշեցնենք՝ Եվրամիության հետ Հայաստանի ասոցացման վերաբերյալ չորս տարի տևած և հաջողությամբ ավարտված բանակցություններից հետո, սեպտեմբերի 3-ին` Ռուսաստանի նախագահ Վլադիմիր Պուտինի հետ հանդիպումից հետո, Հայաստանի նախագահ Սերժ Սարգսյանն անսպասելիորեն հայտարարեց Ռուսաստանի, Բելառուսի և Ղազախստանի հետ համատեղ Մաքսային միության կազմի մեջ մտնելու ցանկության մասին` այդպիսով, փաստորեն, կասեցնելով Եվրամիության հետ ասոցացման գործընթացը:

Շարունակությունը` այստեղ: