Վարդան Պետրոսյանի ձերբակալման որոշում կա

ՀՀ ոստիկանության Նաիրիի քննչական բաժնում, որտեղ ընթանում է Եղվարդ-Երեւան ճանապարհին հոկտեմբերի 20-ին տեղի ունեցած վթարի վերաբերյալ նախաքննությունը, որոշում է կայացվել ձերբակալել վթարի մասնակից` հայտնի դերասան Վարդան Պետրոսյանին: Այս մասին yerkir.am-ին հայտնեց ոստիկանության հասարակայնության հետ կապերի և լրատվության բաժնի աշխատակից Արմեն Մալխասյանը:

Հիշեցնենք, որ վթարը տեղի էր ունեցել Եղվարդ-Երեւան ավտոճանապարհի 32-րդ կմ հատվածում: Բախվել էին BMW մակնիշի 04 ՍԼ 920 համարանիշով եւ «ՎԱԶ 2121» մակնիշի 870 ՕԼ 64 համարանիշով ավտոմեքենաները: Վթարի հետեւանքով 7 հոգի մարմնական վնասվածքներով տեղափոխվել էր հիվանդանոց, այդ թվում` նաեւ Վարդան Պետրոսյանը: «ՎԱԶ 2121» մակնիշի մեքենայի ուղեւորներից Էդգար եւ Էդուարդ Հակոբյանները մահացել էին: Դեպքի առթիվ ոստիկանության Նաիրիի բաժնում հարուցվել էր քրեական գործ ՔՕ-ի 242-րդ հոդվածի 3-րդ մասի հատկանիշներով:

Վթարից տուժած Վարդան Պետրոսյանին  նոյեմբերի 3-ին  դուրս էին  գրել հիվանդանոցից: