Պուտինն, այդուհանդերձ, կարձագանքի Զորի Բալայանի նամակին

Արդեն երեք օր է` մամուլում ակտիվորեն քննարկվում է ՌԴ նախագահ Վլադիմիր Պուտինին ուղարկված Զորի Բալայանի նամակը: Դեռ երեք օր առաջ Yerkir.am-ը կապվել է ՌԴ նախագահի մամուլի գրասենյակի հետ` մի քանի հարցերի պարզաբանումներ ստանալու ակնկալիքով:

Եվ եթե առաջին օրը ՌԴ նախագահի մամուլի ծառայությունից հայտնում էին, որ «նե վիդելի, նե սլիշալի», ապա արդեն այսօր` քիչ առաջ, ՌԴ նախագահի մամուլի գարսենյակից կապվեցին մեր խմբագրության հետ` հայտնելով, որ նամակը ստացել են, մեր հարցերի պատասխաններն արդեն կան, եւ որ այսօր երեկոյան, կամ վաղն առավոտյան մեզ կպատասխանեն:

Yerkir.am-ը մասնավորապես փորձել է պարզել, թե ինչպիսին է Վլադիմիր Պուտինի վերաբերմունքը Զորի Բալայանի նամակին, եւ արդյոք նա պատրաստվում է պատասխանել. ի վերջո նման նամակներ ամեն օր չէ, որ ստանում են:

Հարկ ենք համարում նշել, որ նույն ջանասիրությամբ արդեն երեք օր անընդմեջ փորձում ենք մեր նախագահականի մամուլի ծառայությունից պարզել, թե ինչպիսին է նախագահականի դիրքորոշումը Բալայանի նամակի վերաբերյալ: Ապարդյուն... Մեր նախագահականը ո'չ զանգերին է պատասխանում, ո'չ էլ` փորձում հետադարձ կապ հաստատել մեզ հետ. նախագահի մամուլի քարտուղարն էլ հավերժ զբաղված է: