Վիկտոր Սողոմոնյանն ասաց, թե ինչու Քոչարյանը չի անդրադառնում Մաքսային միությանը...

Թե ինչու մինչ այս պահը ՀՀ նախկին Նախագահ Ռոբերտ Քոչարյանը չի անդրադարձել Մաքսային միությանն անդամագրվելու Հայաստանի ցանկության մասին նախագահ Սերժ Սարգսյանի հայտարարությանը` Ռոբերտ Քոչարյանի գրասենյակի ղեկավար Վիկտոր ՍողոմոնյանըYerkir.am-ին ասաց.

- Կարծում եմ, նախագահ Քոչարյանը դեռ արտահայտվելու առիթ կունենա ԵՄ Ասոցացման համաձայնագրի և Մաքսային միությանն անդամակցվելու մասին հայտարարության հետ կապված այդ ամբողջ պատմության վերաբերյալ, որը հասարակության ոչ միանշանակ արձագանքն է առաջացրել: Սպասվում էր, որ այդ համաձայնագրերի նախագծերը կհրապարակվեն, և կարելի կդառնա ըստ էության տեսակետ հայտնել հարցի վերաբերյալ: Սակայն դա տեղի չունեցավ, և խոսելու դեպքում ստիպված ես կենտրոնանալ ոչ թե կայացված որոշման, այլ` տեղի ունեցած իրադարձության ձևի վրա: Իսկ դրա մասին գործնականում ամեն ինչ ասված է:

Անդրադառնալով վերջերս շրջանառվող այն տեղեկությանը, թե Գառնիկ Իսագուլյանի նախաձեռնությամբ կկայանա Հայաստանի երեք նախագահների հանդիպումը` Վիկտոր Սողոմոնյանը Yerkir.am-ին ասաց.

- Գառնիկ Իսագուլյանի նախաձեռնության ի հայտ գալը անակնկալ էր մեզ համար: Բանն այն է, որ այդ նախաձեռնության մասին հայտարարելու պահից ընդամենը մեկ-երկու օր առաջ պրն Իսագուլյանը հանդիպում և զրույց է ունեցել նախագահ Քոչարյանի հետ, բայց բառ անգամ այդ մասին չի խոսել: Իսկ դրանից հետո հայտարարել է նախագահների հանդիպում կազմակերպելու մտադրության մասին ու Ռոբերտ Քոչարյանի հետ նոր հանդիպման խնդրանքով նամակ է հղել մեր գրասենյակ: Համաձայնեք, որ սա առնվազն անհասկանալի է: Այսպես թե այնպես, մենք չենք պատրաստվում որևէ կերպ արձագանքել Գառնիկ Իսագուլյանի նամակին:

Ագնեսա Խամոյան