ՀԱԿ ակտիվիստը հորդորեց դատախազին` դեմ գնալ իշխանություններին

Այսօր ՀՀ վերաքննիչ դատարանում` դատավոր Եվա Դարբինյանի նախագահությամբ, շարունակվեց ՀԱԿ ակտիվիստների գործով հերթական դատական նիստը:

Այսօրվա նիստին պաշտպանական ճառերով պետք է հանդես գային ամբաստանյալները, սակայն նրանցից Արտակ Կարապետյանը հրաժարվեց ճառից, փոխարենը հայտարարեց, որ ողջ դատաքննության ընթացքում մեղադրողը չկարողացավ այնպիսի մեղադրանք ներկայացնել, որն իրականությանը մոտ լիներ:

«Մեզ առաջադրված մեղադրանքում ակնհայտ են  քաղաքական դրդապատճառները. ես խնդրում եմ, ես  պարտադրում եմ, որ մեզ արդարացնեն»,-ասաց  նա:

Մյուս ամբաստանյալը` Սարգիս Գևորգյանը, իր պաշտպանական ճառում անդրադարձավ այն բոլոր փաստերին, որոնք ապացուցում են, որ իրենց առաջադրված մեղադրանքը քաղաքական պատվեր է և  ապացուցում է ոստիկանության և դատարանի ապօրինի գործողությունները, ինչպես նաև`  իշխանության շահերի սպասարկման գործիք լինելու հանգամանքը: Ըստ նրա`  գործի նախաքննությունն ուղղորդել է նախկին ոստիկանապետ Ալիկ Սարգսյանը:

«Դուք պետք է դրսևորեք առանձնահատուկ  համարձակություն  և կամք, որպեսզի հակառակվեք իշխանություններին և կայացնեք արդարացման դատավճիռ» ,- ասաց Սարգիս Գևորգյանը:

Սարգիսի ճառից հետո դահլիՃում ներկա գտնվողները  սկսեցին ծափահարել: Այս պահին իր պաշտպանական ճառն է ներկայացնում  պաշտան Ստեփան Ոսկանյանը:

Նշենք, որ այսօրվա նիստին չի ներկայացել ամբաստանյալ Տիգրան Առաքելյանի պաշտպան Մուշեղ  Շուշանյանը, ով , ինչպես պարզվեց, վատառողջ է: