ՀՅԴ-ն փոփոխություն է առաջարկում ''Դատախազության մասին'' օրենքում

«Դատախազության մասին» ՀՀ օրենքի 5-րդ հոդվածի երկրորդ մասով սահմանված է, որ գլխավոր դատախազը յուրաքանչյուր տարի ՀՀ ԱԺ է ներկայացնում հաղորդում դատախազության նախորդ տարվա գործունեության մասին, եւ ԱԺ-ին հաղորդումը ներկայացվում է ԱԺ կանոնակարգով սահմանված կարգով: Սակայն «ԱԺ կանոնակարգ» ՀՀ օրենքով սահմանված չէ նշված հաղորդումը ԱԺ ներկայացնելու եւ քննարկելու կարգը:

ԱԺ ՀՅԴ խմբակցությունը հանդես եկել օրենսդրական նախաձեռնությամբ` կանոնակարգելու եւ լուծելու նշված խնդիրը: ՀՅԴ խմբակցությունն առաջարկում է, որ գլխավոր դատախազը «Դատախազության մասին» ՀՀ օրենքով սահմանված հաղորդումը ԱԺ ներկայացնի հաշվետու տարվա ավարտից հետո ոչ ուշ, քան երեք ամսվա ընթացքում եւ ԱԺ-ում քննարկվի մինչեւ տվյալ հերթական նստաշրջանի ավարտը: Գլխավոր դատախազի հաղորդումը ԱԺ-ում պետք է քննարկվի սահմանված կարգով եւ ավարտվի եզրափակիչ ելույթներով` առանց որեւէ փաստաթուղթ ընդունելու:

ՀՅԴ խմբակցությունն առաջարկում է նաեւ, որ քննարկման ընթացքում հիմնական զեկուցմամբ ելույթ ունենա գլխավոր դատախազը` մինչեւ 40 րոպե տեւողությամբ, իսկ հարակից զեկուցմամբ պետաիրավական ոլորտի մշտական հանձնաժողովի ներկայացուցիչը` 20 րոպե տեւողությամբ:

Օրենքի նախագիծն արդեն շրջանառության մեջ է: