Տրանսպորտի թանկացման դեմ հայցադիմումները մերժած դատավորի հարցերը լուրջ են

ՀՀ Վարչական դատարանը երեկ երկրորդ անգամ հետ է վերադարձրել հասարակական տրանսպորտի ուղեվարձի բարձրացման վերաբերալ քաղաքապետի որոշումներն  անվավեր ճանաչելու մասին «Բարև Երևան» խմբակցության 2 հայցադիմումները:
Նշենք, որ այդ հայցադիմումներում  ներկայացված էին  մեկ տասնյակից ավելի խախտումներ, որոնք առնչվում էին Երևանում տրանպորտի ուղեվարձի բարձրացմանը:

Երևանի քաղաքապետարանի «Բարև Երևան» խմբակցության քարտուղար Ստյոպա Սաֆարյանի  խոսքով` հայցադիմումների մերժումն ապացուցեց, որ  Հայաստանում  արդարադատությունը սպանվել է և սպանվում է, իսկ  դա արվում է պատվերով, բացահայտ ցինիզմով և լկտիությամբ:

«Ամեն անգամ մենք հասկանում ենք, որ  նման կատարածուներն ուղղակի մեզ ասում են, որ դուք անելիք չունեք այս երկրում»,- ասաց Սաֆարյանը և հավելեց, որ հայցադիմումները  մերժած դատավոր Արծրուն Միրզոյանի հարցը պետք բարձրացվի Արդարադատության խորհրդում, որպեսզի նրա նկատմամբ կարգապահական վարույթ հարուցվի:

«Մենք պետք է ամեն ինչ անենք` ՀՀ արդարադատությունը խլելու համար նման դատավորի ճիրաններից: Նա իրավունք չունի կրելու  դատավոր բարձր կոչումը և ցինիզմով մեկնաբանելու օրենքը և թքելու հասարակության երեսին` կանաչ լույս վառելով նրա հարստահարման և ունեզրկման վրա»,- նշեց նա:

Սաֆարյանի խոսքով` իրենք անպայման վճիռը բողոքարկելու են Վերաքննիչ ատյանում: