Պատգամավորները դժգոհ են Նալբանդյանից

Արդեն տեղեկացրել ենք, որ ԱԳ նախարարի եւ ԱԺ պատգամավորների միջեւ` շուրջ մեկ ժամ տեւած հանդիպումն ավարտվել է:

Լրագրողների հետ զրույցում պատգամավորները հիմնականում դժգոհում էին, որ Նալբանդյանի պատասխաններն իրենց չեն բավարարել:

ԱԺ ԲՀԿ խմբակցության քարտուղար Նաիրա Զոհրաբյանը նշեց. «Ես չստացա իմ հարցի պատասխանը, թե ինչ է շահում ՀՀ-ն` տնտեսական մեկ ռեժիմը մեկ այլ ռեժիմով փոխարինելով»:

«Ազատ դեմոկրատներ» կուսակցության ղեկավար, ԱԺ անկախ պատգամավոր Խաչատուր Քոքոբելյանը եւս իրեն հետաքրքրող հարցերի պատասխանները չի ստացել: Նա նշեց, որ ժամանակը սահմանափակ էր, եւ շատ հարցեր մնացին բաց: «Մասնավորապես` ես շատ կուզենայի, որ խոսվեր այսօր Ամերիկայի նախագահի կողմից այդ հայտնի նամակի մասին` կապված Ղարաբաղի հետ: Կուզենայի, որ խոսվեր իրավահավասարության մասին: Այնուամենայնիվ, ինձ հետաքրքրող հարցերը չհնչեցվեցին, իսկ ես հնարավորություն չունեցա այդ հարցերը հնչեցնելու` հույս ունենալով առաջիկայում գրավոր կամ ԱԺ ամբիոնը օգտագործելով բարձրացնել այդ հարցերը»,- նշեց Քոքոբելյանը: