Ուսանողը պնդում է` ոստիկանի պահանջն օրինական չէ

Արդեն հայտնել ենք, որ այսօր առավոտյան ուսման վարձավճարների բարձրացման դեմ ԵՊՀ-ի մոտ անցկացվող բողոքի ակցիայի ժամանակ ոստիկանները բերման են ենթարկել ԵՊՀ ուսանող, ակտիվիստ Հարութ Մկրտչյանին: Ոստիկանները պահանջել էին բարձրախոսներով հայտարարություններ չանել, քանի որ խախտում են դասապրոցեսը, սակայն Մկրտչյանը հրաժարվել էր կատարել ոստիկանների պահանջը:

Yerkir.am-ի հետ զրույցում Մկրտչյանը նշեց, որ ոստիկանությունում իրեն ասել են, որ ամեն ինչ օրենքի սահմաններում են արել ոստիկանները:

«Ինձ ասացին, որ չեմ ենթարկվել ոստիկանի օրինական պահանջներին` շեշտելով, որ ոստիկանի պահանջն օրինական է եղել: Բայց այդ պահանջը չի կարող օրինական համարվել, քանի որ օրենք չկա այդ պահանջի հիմքում: Եվ նա, օրենքի մարդ լինելով, խախտում է օրենքը` խոչընդոտելով իմ` ազատ տեղաշարժի իրավունքին»,- ասաց Մկրտչյանը:

Նշենք նաեւ, որ Մկրտչյանին ազատ են արձակել Վարչական իրավախախտման մասին օրենսգրքի 182-րդ հոդվածի հատկանիշներով արձանագրություն կազմելուց հետո: