Գոնսալո Գուարչը` Մայր Աթոռում

Հունիսի 21-ին Մայր Աթոռ Սուրբ Էջմիածնում Ն.Ս.Օ.Տ.Տ. Գարեգին Բ Ծայրագույն պատրիարք և Ամենայն Հայոց կաթողիկոսն ընդունեց իսպանացի նշանավոր գրող Գոնսալո Գուարչին` ուղեկցությամբ Հայաստանի գրողների միության նախագահ Լևոն Անանյանի:    

Ողջունելով իսպանացի մտավորականի այցը համայն հայության հոգևոր կենտրոն` Նորին սրբությունն իր բարեմաղթանքն ու օրհնությունը բերեց նրան և հանդիպմանը ներկա ընտանիքի անդամներին:

Գոնսալո Գուարչն իր հերթին շնորհակալություն հայտնեց Նորին սրբությանը ջերմ ընդունելության համար և Վեհափառ հայրապետին փոխանցեց Հայոց ցեղասպանությանը նվիրված` իր «Հայկական կտակ», «Սպիտակ լեռ» և «Հայոց ծառը» ստեղծագործությունների ռուսերեն թարգմանությունները:

Զրույցի ընթացքում Վեհափառ հայրապետը գնահատանքով անդրադարձավ Գոնսալո Գուարչի ստեղծագործություններին` նշելով, որ գրողի ազնիվ զգացումներն արտահայտող ստեղծագործությունները մարդասիրական այն փաղանգի շարունակությունն են, որոնք իրենց ձայնն են բարձրացրել  Հայոց ցեղասպանության ճանաչման և դատապարտման համար: Ամենայն Հայոց կաթողիկոսը գոհունակություն հայտնեց Գոնսալո Գուարչին հայ ժողովրդին և առհասարակ համայն մարդկությանը բերած ծառայությունների համար` մասնավորապես շեշտելով, որ իսպանացի գրողի պես անձանց ջանքերի շնորհիվ Հայոց ցեղասպանությունը պիտի ճանաչվի ու դատապարտվի բոլոր ժողովուրդների ու պետությունների կողմից: