"Սպայկայի" հրդեհը չի ազդի մթերումների գների ու ծավալների վրա

«Սպայկա» ընկերությունում տեղի ունեցած հրդեհը չի ազդի ընկերության կողմից մթերվող ապրանքների գնային քաղաքականության ու արտահանման ծավալների վրա. լրագրողներին այսօր հավաստիացրեց «Սպայկա» ընկերության նախագծերի կառավարման բաժնի պետ Կարեն Բաղդասարյանը:

Նա հավելեց, որ ինչպես պլանավորված էր մինչ հրդեհը, նույն տեմպով իրականացվում է մթերումը, նույնիսկ այս տարի ծավալներն ավելի մեծ կլինեն, քան անցյալ տարի:

«Մեզ հետ տեղի ունեցած վթարը կարող էր մեծապես ազդել մթերումների վրա, քանի որ մենք նախօրոք նախապատրաստվել էինք` փաթեթավորման, պահեստավորման եւ լոգիստիկայի հարցերն էին նախօրոք լուծված: Մայիսի 15-ի գիշերը մեզ հետ դեպքը տեղի ունեցավ, բայց ընդամենը 1 ամսվա ընթացքում շատ արագ` արդեն հունիսի 16-ից գործարկել ենք մեր նոր սառնարանային համալիրը` 1000 տոննա տարողությամբ, որն արդեն իսկ աշխատում է: Եվս մեկ այլ 1000 տոննայանոց սառնարանի աշխատանքն էլ 12 օրից կմեկնարկի: Այսինքն` ընդհանուր առմամբ, որեւէ կերպ մենք թույլ չտվեցինք, որ վթարն ազդի մթերումների վրա»,- ասաց Կարեն Բաղդասարյանը:

Նա տեղեկացրեց նաեւ, թե գների մասով Հայաստանում ամենածանր տարին եղել է 2010 թվականը, երբ ցրտահարության հետեւանքով Հայաստանում շատ քիչ ծիրան կար: Իսկ այս պահին ծիրան կա եւ այնքան, որ սեզոնի մեկնարկից դեռ մեկ շաբաթ էլ չի անցել, բայց արդեն 3000 տոննա արտահանվել է: