Անձնական տեսակետ հայտնելը չի կարող պատժամիջոցների կիրառման հիմք հանդիսանալ

Հեռուստամեկնաբան Արմեն Դուլյանին աշխատանքից հեռացնելը հանրային քննարկումների առիթ տվեց, եւ հաճախ այդ միջադեպին խոսքի ազատության սահմանափակման գնահատականներ են տրվում, թեեւ Հայաստանում որեւէ իրավական ակտով սահմանված չէ, թե ինչ է իրենից ներկայացնում խոսքի ազատությունը. լրագրողներին այսօր ասաց Հայաստանի արհմիությունների կոնֆեդերացիայի փոխնախագահ Բորիս Խառատյանը` անդրադառնալով միջադեպին:

«Մեր իրավական ակտերը դրա մասին ոչինչ չեն ասում: Պետք է միջազգային իրավական փաստաթղթերին անդրադառնանք, որն արգելված է: Խոսքի ազատության վերաբերյալ, հիմք ընդունելով ՀՀ Սահմանադրության 14.1 հոդվածը, որտեղ սահմանված է, որ բոլորն ունեն հավասար իրավունքներ, եւ բոլորը հավասար են օրենքի առջեւ` անկախ սեռից, ծագումից, դավանանքից, լեզվից, կրոնից, քաղաքական հայացքներից, այլ ՀԿ-ների անդամակցելուց, ծագումից, ընտանեկան եւ սոցիալական դրություններից եւ այլն, եւ դրանից բխող իրավահավասարության դրույթը, որտեղ նույնպես նշված է, որ աշխատանքային հարաբերությունները պետք է ձեւավորվեն` հաշվի առնելով միայն տվյալ աշխատողի աշխատանքային հատկանիշները, կարող եմ ասել, որ համոզմունքները եւ տեսակետները չեն կարող հիմք հանդիսանալ աշխատանքային հարաբերությունների լուծման համար: Այսինքն` եթե անձը հայտնում է մի ինչ-որ տեսակետ, դա չի կարող հիմք հանդիսանալ, որ նրա նկատմամբ որոշակի պատժամիջոցներ կիրառվեն»,- ասաց Խառատյանը:

Yerkir.am-ի հարցին` եթե տվյալ մարդն աշխատում է հանրային կարծիք ձեւավորող ոլորոտում, ու նրա կարծիքը հանրային կարծիք ձեւավորող գործոն է, իսկ կարծիքների երկձեւությունը` հանրային կարծիքի խեղաթյուրման ու շփոթության պատճառ, այդ մարդուն տարբեր վայրերում նույն հարցի վերաբերյալ տարբեր կարծիքներ հայտնելու դեպքում իրավական ինչպիսի՞ գնահատական պետք է տրվի, Բորիս Խառատյանը նշեց, որ այդպիսի դեպքում դա դառնում է բարոյական խնդիր յուրաքանչյուրի համար:

«Օրինակ` ես կարող եմ այս միջավայրում մեկ բան ասել ու, դուրս գալով, սենյակից` մեկ այլ բան. դա արդեն օրենքի կարգավորման խնդիր չէ, մանավանդ եթե որեւէ վնաս չի պատճառում»,- ասաց արհմիությունների կոնֆեդերացիայի փոխնախագահը: