Փոխարժեքներ
07 10 2024
|
||
---|---|---|
USD | ⚊ | $ 386.93 |
EUR | ⚊ | € 424.27 |
RUB | ⚊ | ₽ 4.02 |
GBP | ⚊ | £ 505.41 |
GEL | ⚊ | ₾ 141.01 |
ՀՔԱ Վանաձորի գրասենյակն այսօր հաղորդագրություն է տարածել, որում մասնավորապես ասված է.
«Մենք շարունակում են ստանալ առողջական խնդիրներով ՀՀ տարբեր բնակավայրերից զինծառայողների հետ կապված ահազանգեր ծնողների կողմից:
2012-ի դեկտեմբերի 26-ին Լոռու մարզի Աքորի գյուղից զինված ուժեր զորակոչված Սևակ Ռաֆիկի Թոմոյանը զորակոչի ընթացքում Ալավերդու զինկոմիսարիատից մի քանի անգամ ենթարկվել է բուժզննության հանրապետական զորակոչային հանձնաժողովի կողմից:
Դեռևս մանկական հասակում ունենալով առողջական խնդիրներ՝ քթի կոտրվածք, որը մշտապես դժվարացրել է շնչառությունը, հևոցներ, գլխացավեր, ճնշման տատանում, որի արդյունքում անընդհատ քթից արյունահոսություն է ունեցել, Սևակ Թոմոյանը ճանաչվել է պիտանի ոչ շարային ծառայության համար: Վերջինս, զինվորական ծառայության է անցել ԼՂՀ Մարտունու N զորամասում: Զինվորական երդման արարողության օրը՝ 2013 թ-ի հունվարի 31-ին, առողջական խնդիրների պատճառով, մասնավորապես՝ բարձր ջերմությամբ, տեղափոխվել է բուժկետ: Պարզվել է, որ նա հիվանդացել է ջրծաղիկով և նույն օրը ծանր վիճակում տեղափոխվել է Խոջալուի հիվանդանոց, որտեղ տասնչորս օր բուժում է ստացել և վերադարձել զորամաս: Զորամասում շարունակվել են այս անգամ էլ ճնշման տատանումները, որի հետևանքով ուշաթափություն և քթի արյունահոսություն է ունեցել:
Հաշվի չառնելով զինծառայողի վիճակը՝ 21 օր հետո նրան ուղարկել են զորամասում հերթապահություն իրականացնելու, սակայն, ընկնելով անձրևի տակ՝ նրա ջերմությունը կտրուկ բարձրացել է և գրեթե անգիտակից վիճակում տեղափոխվել է Մարտունու հիվանդանոց: Զինծառայողի մոր՝ Սիրանույշ Թոմոյանի հավաստմամբ՝ ի վիճակի չլինելով համապատասխան բժշկական օգնություն տրամադրել 4-5 օր շարունակ, որդուն տեղափոխել են Ստեփանակերտի հիվանդանոց, որտեղ արդեն նա կորցրել է գիտակցությունը վերականդանացման բաժանմունքում և թթվածնային բալոնի օգնությամբ գրեթե մահամերձ վիճակում տեղափոխել են Մուրացանի հոսպիտալ: Բժշկական զննության արդյունքում պարզվել է, որ նրա մոտ առկա է երկկողմանի թոքաբորբ, թոքերի ձախ խոռոչի մեջ ջուր է հավաքվել և առաջացել են բարդություններ: 2013 թ-ի մարտի 13-ին վիրահատել են և կատարել են ձախ խոռոչի դրենաժավորում և շարունակել դեղորայքային բուժումը: Մի քանի օր վերակենդանացման բաժանմունքում գտնվելուց հետո բուժումը շարունակվել է, իսկ սույն թվականի ապրիլի 15-ին զինծառայողը ուղարկվել է մայրական խնամքի: Մայիսի 2-ին կրկին տեղափոխվել է Մուրացանի հոսպիտալ, որտեղից արդեն երկու օր առաջ դուրս է գրվել, սակայն չի տեղափոխվել զորամաս ՀՀ պաշտպանության նախարարին մոր կողմից հասցեագրված նամակի արդյունքում:
Զինծառայողը այժմ գտնվում Մուրացանի հոսպիտալում, սակայն չի ստանում որևէ բուժում, չնայած նրան որ գանգատվում է ընդհանուր թուլությունից և վատ շնչառությունից:
ՀՔԱ Վանաձորի գրասենյակը Ս. Թոմոյանի առողջական վիճակի վատթարացման մեջ ամբողջովին պատասխանատու է համարում պաշտպանության նախարարությանը, գտնում է, որ չի իրականացվել պատշաճ բժշկական զննություն զինվորական ծառայությանը Ս. Թոմոյանին պիտանի ճանաչելու նպատակով:
Հաշվի առնելով զինծառայողի առողջական վիճակի պարբերական վատթարացումը և փաստացի նրա կողմից զինվորական ծառայությանը ոչ պիտանի լինելը՝ ՀՔԱ Վանաձորի գրասենյակը պահանջում է անհապաղ զորացրել Ս. Թոմոյանին և ապահովել ՀՀ պաշտպանության նախարարության միջոցներով վերջինիս բուժումը»: