ՀՔԾ-ն հաստատել է նախկին մարզպետի նկատմամբ հարուցված քրգործի առկայությունը

ՀՀ հատուկ քննչական ծառայությունը պաշտոնապես հաստատել է Վայոց ձորի նախկին մարզպետի կողմից պաշտոնեական դիրքը չարաշահելու դեպքի առթիվ  քրեական գործի առկայությունը։

«Փաստինֆո»-ի գրավոր հարցմանն ի պատասխան, ՀՀ հատուկ քննչական ծառայությունից հայտնել են, որ ՀՀ գլխավոր դատախազության կողմից քրեական գործ է  հարուցվել  Վայոց ձորի նախկին մարզպետ Սերգեյ Բագրատյանի, մարզի գյուղատնտեսության վարչության պետ Բաբկեն Մկրտչյանի և մարզի մի քանի համայնքների ղեկավարների կողմից պաշտոնեական դիրքը չարաշահելու և նախնական համաձայնությամբ առանձնապես խոշոր չափերով հափշտակություն կատարելու դեպքի առթիվ՝ ՀՀ քրեական օրենսգրքի 308-րդ հոդվածի 2-րդ մասով, 179-րդ հոդվածի 2-րդ մասի 1-ին և 3-րդ մասի 1-ին կետերով։ Քրեական գործը հարուցվել է  2013 թվականի մայիսի 2-ին՝  ՀՀ ոստիկանության Կազմակերպված հանցավորության դեմ պայքարի գլխավոր վարչությունում նախապատրաստված նյութերի հիման վրա:

Հիշեցնենք, որ Սերգեյ Բագրատյանը Երևանի ավագանու  ԲՀԿ ցուցակի 4-րդ համարն էր և ընտրություններից առաջ հերքում էր իր անվան շուրջ ծավալված խոսակցությունները, այդ թվում` իր նկատմամբ հարուցված քրգործի առկայությունը: