Ընտրախախտումների փաստով նոր քրեական գործեր են հարուցվել

Մայիս 5-ին կայացած` ավագանու ընտրությունների ժամանակ գրանցված ընտրախախտումների փաստով ոստիկանությունում հարուցվել են թվով 7-րդ և 8-րդ քրգործերը:

Այսպես` մայիսի 5-ին` ժամը 21:25-ին, ոստիկանության Երևան քաղաքի վարչության օպերատիվ կառավարման կենտրոնից ոստիկանության Մաշտոցի բաժնում հաղորդում է ստացվել, որ iditord.am կայքում տեղեկություն է տեղադրվել, որ թիվ 5/10 տեղամասում Նապոլեոն և Հայկ Մ.-երը պարզել են, որ իրենց ստորագրության փոխարեն առկա են այլ անձանց ստորագրություն:
Փաստի առթիվ ոստիկանության Մաշտոցի  քննչական բաժնում հարուցվել է քրեական գործ ՀՀ քրեական օրենսգրքի 153 հոդվածի հատկանիշներով:
Կատարվում է նախաքննություն:

Մայիսի 5-ին ոստիկանության Մաշտոցի բաժնում Սմբատ Վ.-ն հաղորդում է տվել, որ նույն օրը Երևան քաղաքի ավագանու ընտրությունների ժամանակ  թիվ 5/08 ընտրատեղամասում ընտրություն կատարելիս նկատել է, որ իր տվյալների դիմաց  գրանցամատյանում  այլ քաղաքացի է ստորագրել:
Փաստի առթիվ ոստիկանության Մաշտոցի  քննչական բաժնում հարուցվել է քրեական գործ ՀՀ քրեական օրենսգրքի 153 հոդվածի հատկանիշներով:
Կատարվում է նախաքննություն: