Սերբիան չի ստորագրի Կոսովոյի հետ համաձայնագրի` իրեն առաջարկված տարբերակը

Սերբիան չի ստորագրի Կոսովոյի հետ հարաբերությունների բնականոնացման` իրեն առաջարկված տարբերակը. այսօր հայտարարել է Սերբիայի պաշտպանության նախարար Ալեքսանդր Վուչիչը:

«Կառավարությունը կպահանջի երկխոսության անհապաղ շարունակություն: Չենք ստորագրի համաձայնագիրը, սակայն կշարունակենք բանակցությունները»,- ըստ ИТАР-ТАСС-ի` ասել է նա լրագրողներին:

Ըստ Վուչիչի` երկրի ղեկավարությունը պահանջելու է, որ կոսովյան սերբերին անվտանգության մեծ երաշխիքներ տրամադրվեն: «Իրական չէ Սերբիայից պահանջել ստորագրել համաձայնագրի այն տարբերակը, որն առաջարկվում է հիմա»,- ընդգծել է նա:

Ավելի վաղ Սերբիայի նախագահ Տոմիսլավ Նիկոլիչը հայտարարել էր, որ Բրյուսելում բանակցությունների ժամանակ Բելգրադին փաստացի վերջնագիր է ներկայացվել, որի պայմաններն անհնար է ընդունել: