Նոր քաշային կարգում ինձ հիանալի եմ զգում. Մուսա Մուրթազալիև

Ըմբշամարտի Եվրոպայի առաջնության ազատ ոճային ըմբիշ, 84 կգ քաշային կարգի Մուսա Մուրթազալիևը, ով եզրափակիչում պարտվեց վրացի Դավիդ Մարսագիշվիլիին, yerkir.am-ի հետ զրույցում նշեց, որ նոր քաշային կարգում իրեն հիանալի է զգում:

- Պատմեք եզրափակիչ գոտեմարտի մասին. վրացի ըմբիշը շատ ուժեղ մրցակից էր:

-Մրցակիցը, իրոք, շատ լավն էր: Նա վաղուց է հանդես գալիս 84 կգ քաշային կարգում, իսկ ես նոր եմ փոխել քաշս, բարդ էր մի քիչ: Եզրափակիչում միշտ էլ բարդ է լինում:

- Իսկ Ձեզ չէ՞ր խանգարում այն փաստը, որ մրցակցի հայրենիքում էր մրցաշարը. երկրպագուների աջակցությունը մեծ էր:

-Ո՛չ, բնավ: Դա կարող է ճնշել սկսնակ մարզիկներին, ես վաղուց եմ նման մրցաշարերում հանդես գալիս: Պարզապես ուշադրություն չեմ դարձնում:

-Ուկրաինան ներկայացնող ըմբիշի մասին ի՞նչ կասեք, չէ՞ որ նա խմբում բացահայտ առաջատար էր:

 -Այո՛,  նա առաջատար էր, բայց գոտեմարտի ընթացքում ես զգացի, որ չեմ զիջում նրան ո՛չ տակտիկապես, ո՛չ տեխնիկապես և կարողացա միավոր վաստակել վերջին վայրկյաններին:

 -Նոր քաշային կարգում ինչպե՞ս եք զգում Ձեզ:

- Հիանալի, ավելի լավ քան նախորդ՝ 74 կգ քաշային կարգում: Տարօրինակ է, բայց  այս քաշում ինձ ավելի թեթև եմ զգում, ավելի շարժուն, քան առաջ:

Շուշանիկ ՀԱԿՈԲՅԱՆ

Թբիլիսի