Շուշին ձեռքից բաց թողած ադրբեջանցի նախարարին ազատ են արձակել

Yerkir.am-ը տեղեկացրել է, որ երեկ ձերբակալվել էր Ադրբեջանի պաշտպանության նախկին նախարար Ռահիմ Ղազիեւը: Ուշ գիշերին նրան ազատ են արձակել. տեղեկացնում է Turan գործակալությունը:

Ղազիեւին ձերբակալել են քաղաքացիական հագուստով մարդիկ, երբ նա գնալիս է եղել «Ազատություն» ռադիոկայանի ադրբեջանական ծառայության գրասենյակ: Ղազիեւի խոսքերով` իրեն նստեցրել են ավտոմեքենա եւ տարել կազմակերպված հանցագործությունների դեմ պայքարի վարչություն: Այնտեղ նրան հասկացրել են, որ ձերբակալությունը կապված է մամուլում նրա ելույթների հետ:

«Նրանք ինձ ասացին. «Սկսել ես ինչ-ոչ բաներ գրել այնտեղ-այնտեղ, քեզ հանգիստ պահիր»,- պատմել է Ղազիեւը: Այնուհետեւ նրան փակել են մենախցում եւ ազատ արձակել ուշ գիշերին:

Մարտի 17-ին «Ազադլըգ» թերթում Ղազիեւը Իլհամ Ալիեւին ուղղված բաց նամակ էր հրապարակել, որում քննադատել էր նախագահի քաղաքականությունը, կոռումպացված պաշտոնյաներին, այլախոհների հետապնդումները, բանակում զինվորների մահերը ոչ մարտական պայմաններում:

Ղազիեւը պաշտպանության նախարար է եղել 1992-1993 թթ.: 1993-ին ձերբակալվել է Շուշին հանձնելու մեղադրանքով եւ մահվան դատապարտվել ռազմական հանցագործությունների համար, որը փոխարինվել է ցմահ բանտարկությամբ: 2005-ին նրան ներում է շնորհվել: