Սեդրակ Քոչարյանը չի մասնակցի ընտրություններին. Վիկտոր Սողոմոնյան

Արդեն տեւական ժամանակ է` տարբեր լրատվամիջոցներ գրում են, որ Երեւանի ավագանու ընտրություններում ԲՀԿ ցուցակը կգլխավորի Ռոբերտ Քոչարյանի որդին` Սեդրակ Քոչարյանը: Ավելին` թերթերից մեկն էլ այսօր գրել է, որ, ըստ որոշ տեղեկությունների, ԲՀԿ երեկվա քաղխորհրդի նիստում այս հարցի շուրջ կրքերն այնքան են բորբոքվել, որ ԲՀԿ նախագահ Գագիկ Ծառուկյանն առաջարկել է հետաձգել նիստը:

Yerkir.am-ը Ռոբերտ Քոչարյանի գրասենյակի ղեկավար Վիկտոր Սողոմոնյանից փորձել է պարզել, թե ճի՞շտ է, որ ԲՀԿ-ի ցուցակը գլխավորելու է Սեդրակ Քոչարյանը:

Սողոմոնյանը նախ հայտնեց, որ, բնականաբար, ԲՀԿ-ի ցուցակից տեղյակ չէ, բայց նաեւ վստահեցրեց.  «Սեդրակ Քոչարյանը չի պատրաստվում մասնակցել Երեւանի ավագանու ընտրություններին»:

Այն, որ ԲՀԿ-ի ցուցակը գլխավորելու է Քոչարյանի որդին, «աբսուրդ» որակեց ԱԺ ԲՀԿ խմբակցության քարտուղար Նաիրա Զոհրաբյանը: Նա նաեւ հայտարարեց, որ այդ տեղեկատվությունը կոնկրետ մեկ կենտրոնից ուղղորդվող, «գցված» ապատեղեկատվություն է:

«Նման քննարկում` ո'չ հեռավոր, ո'չ մոտավոր, ո'չ էլ ակնարկներով, չի եղել եւ չի լինելու»,- նշեց Զոհրաբյանը:

Դիտարկմանը, որ հնարավո՞ր է` ցուցակը գլխավորի ՄԱԿ ղեկավար, ԱԺ ԲՀԿ խմբակցության պատգամավոր Գուրգեն Արսենյանը, նա ասաց, որ այդ հարցին հիմա չի կարող պատասխանել, եւ որ առաջիկա երկու-երեք օրերի ընթացքում ԲՀԿ-ի ցուցակը պարզ կլինի: