Նպատակը ընտրությունների բնականոն ընթացքի վրա ազդելն էր. Սերժ Սարգսյան

ՀՀ գործող նախագահ, նախագահի թեկնածու Սերժ Սարգսյանն արդեն դուրս է եկել ԱԻՄ ղեկավար, ՀՀ նախագահի թեկնածու Պարույր Հայրիկյանի հիվանդասենյակից:

Նա լրագրողների հետ զրույցում կատարվածը որակեց «զազրելի հանցագործություն»:

«Սա ոչ միայն Հայրիկյան` նախագահի թեկնածու, Հայրիկյան` պետական գործչի դեմ է, այլ նաև մեր պետականության: Ակնհայտ է, որ նրանք, ովքեր կանգնած են այս հանցագործության հետևում նպատակ են ունեցել ազդել ընտրությունների բնականոն ընթացքի վրա: Բոլորդ վստահ եղեք, որ մեր իրավապահ մարմինները ամեն ինչ անելու են` հանցագործությունը բացահայտելու համար: Մեր բժիշկներն արդեն շատ բան են արել, և վստահ եմ, որ կարճ ժամանակահատվածում Հայրիկյանը կապաքինվի»,- ասաց ՀՀ նախագահը:

Լրագրողների հարցին, թե ընտրությունները հնարավո՞ր է` հետաձգվեն, նախագահը չպատասխանեց, շնորհակալություն հայտնեց և հեռացավ:

Նշենք, որ ՀՀ նախագահը մեծ դժվարությամբ էր խոսում, ձայնը խզված էր: Ի դեպ, դեռ երեկ Կոտայքի մարզում քարոզարշավի ժամանակ ակնհայտ էր, որ նախագահը մրսել է: