Րաֆֆի Հովհաննիսյանը կոչ է անում` չվախենալ

«Ժառանգություն» կուսակցության ղեկավար, նախագահի թեկնածու Րաֆֆի Հովհաննիսյանի նախընտրական քարոզարշավը մեկնարկեց Արամ Խաչատրյանի արձանի մոտից: Թեկնածուին սատարելու էին եկել կամավորներ հանրապետության տարբեր մարզերից և Երևանի վարչական շրջաններից:

Րաֆֆի Հովհաննիսյանը ելույթում ասաց,  որ իրենք իշխելու համար չեն եկել, այլ ծառայելու ,և որ դա շոշափելի արդյունքների է բերելու:

«Ճարպը հանելով պետական բյուջեից` մեկ տարի անց, ժողովրդի մասնակացությամբ, մենք 50%-ով կավելացնենք  կենսաթոշակները, գյուղը կդառնա հարուստ: Պետական հետևողական աշխատանքներով  5 տարվա ընթացքում ունենալու ենք նոր Սահմանադրություն: 600 հազար քաղաքացի վերջապես դուրս կգա աղքատության ճիրաններից, կստեղծվեն 180 հազար նոր աշխատատեղեր, կվերացվի արտագաղթը, համայն աշխարհից հարյուր հազարավոր հայեր կվերադառնան ազատ և արդար Հայաստան»,- մասնավորապես` նշեց Հովհաննիսյանը` միաժամանակ հույս հայտնելով, որ ժողովրդի մոտ կվերանա համատարած վախի մթնոլորտը, և նրանք չեն խուսափի հանրահավաքների գնալ:

Թեկնածուն կոչ արեց երկրի նախագահին` չդիմել կեղծիքների: «Ես կոչ եմ անում իմ գլխավոր մրցակից Սերժ Սարգսյանին`  մեր պետական կառույցները չօգտագործել մեր քաղաքացիների իրավունքները ոտնահարելու համար:  Եթե նման բան նկատեմ` կպայքարեմ դրանց դեմ` ընդհուպ մինչև միջազգային ատյաններում»,- ասաց նա:

Րաֆֆի Հովհաննիսյանը նշեց նաև, որ անպայման այցելելու է  նախագահի թեկնածու Անդրիաս Ղուկասյանին` նրան հորդորելու, որ հրաժարվի հացադուլից, քանի որ իր փորձից գիտի, որ, սեփական առողջությունը վնասելով, ոչնչի չի հասնի:

Yerkir.am-ի հետ զրույցում հավաքված քաղաքացիներից մեկը նշեց, որ երեկ է որոշել սատարել Հովհաննիսյանին, ավելին` նրան տեսել է երազում և հավատում է Րաֆֆիի կառուցած Հայաստանին: Սակայն, երբ խնդրեցինք նույնը կրկնել տեսախցիկի առաջ, լռեց:

Շատերն էին խուսափում մեկնաբանություն տալ: Մեզ հետ զրույցում մի երիտասարդ պատասխանեց, որ ինքը չի վախենում բարձրաձայնել, որ Րաֆֆիին է ընտրելու, իսկ մյուս քաղաքացիների վախը բացատրեց իշխող վարչակարգի քաղաքականությամբ. «Մարդիկ վախենում են գալ հանրահավաքների, քանի որ կարծում են, որ այս ամենը նկարահանվում է, և դրա հետևանքով հնարավոր է` աշխատանքից զրկվեն: Սակայն կարծում եմ, որ ընտրության օրը քվեախցում իրենց խղճի առջև ոչ ոք չի լինի և կկարողանան ճիշտ ընտրություն անել»: