''Կյանքից հեռացավ'' ևս մեկ աղբաման

Այս աղբամանը դեռ երեկ «կենդանի էր»,  լավ, թե վատ` ծառայում էր հասարակությանը: Չնայած իր ամենօրյա ծանրաբեռնվածությանը` շարունակում էր կլանել աղբը, մի մասը ներսում, մյուս մասը` դրսում, հանդուրժում վրան լղոզված ծամոններն ու ծխախոտի մնացուկները: Ինչի հետևանքով էլ, ըստ երևույթին, ի վերջո, «կնքեց մահկանացուն»:

Այսօր Խանջյան փողոցի աղբից ճռռացող երբեմնի աղբամանից մնացել է միայն  հալած մոմ հիշեցնող պատկերը: Անցորդները զարմացած նայում են աղբամանին և հեռանում:  Սակայն այդ զարմացողներից շատերը վարվում են նույն կերպ, ինչպես արել է աղբամանի հրդեհման պատճառը հանդիսացած քաղաքացին` ծխախոտն առանց հանգցնելու գցել աղբամանը:

Հատկանշական է, որ աղբամանը վաղ առավոտից չի ապամոնտաժվել: Կենտրոն համայնքի աղբատար մեքենաները, եթե ժամանակին դատարկեին հարևան աղբամանների աղբը, գուցե այս աղբամանն էլ նկատեին և «կարգին հուղարկավորություն կազմակերպեին»: Չէ՞ որ  «խեղճ» աղբամանն անգամ այրվելու պահին կատարել է աղբամաքրումն իրականացնողների աշխատանքը` ոչնչացնելով այն աղբը, որը հնարավոր է հանգրվաներ քաղաքից դուրս` ինչ-որ խուլ ձորում` մեծ վնաս հասցնելով շրջակա միջավայրին: