Բանվորին ծաղրել են, երբ պատմել է մահացած մոր մասին երազներից

Երևանի գարեջրի գործարանի նախկին բեռնակիր, անմեղսունակ Հովհաննես Պարուրյանին մեղադրանք է առաջադրվել նույն գործարանի աշխատակից Լ.Ահարոնյանի գլխին մուրճով մեկ անգամ հարվածելու համար:

Նախաքննությամբ պարզվել է, որ քրեական օրենքով արգելված արարք կատարած` անմեղսունակ Հովհաննես Պարուրյանը 2003-ին բանակից զորացրվելուց հետո ունեցել է հոգեկան անհավասարակշիռ շեղումներ է, մասնավորապես` գիշերները ջղաձգվել են դեմքի մկանները, ցանկացել է արթնանալ, սակայն չի կարողացել, հաճախ է երազում տեսել իրեն հետապնդող չարքերի, տեսել է մահացած մորն, ով անընդհատ հետապնդել է իրեն: Հովհաննեսն, աշխատելով Երևանի գարեջրի գործարանում,  իր հոգեկան ապրումների մասին հաճախակի պատմել է գործարանի աշխատողներին, ովքեր, տեղյակ լինելով և նկատելով Պարուրյանի հոգեկան վիճակը, հիմնականում չեն շփվել նրա հետ:

Հովհաննեսը կարծել է, թե որոշ աշխատողներ ծաղրել են իր հոգեկան ապրումները: Մասնավորապես`  գործարանում` որպես փորձարկող աշխատող Ահարոնյանը այլ աշխատողների մոտ բազմիցս ծաղրել է և խոսել իր մասին: Պարուրյանը նրան նախազգուշացրել է, որ իր մասին ուրիշների մոտ ծաղրանքով չխոսի, սակայն վերջինս չի ընդունել դա` ասելով, որ ինքը չի ծաղրել:

Դեպքի օրը` անցյալ տարվա հունվարին,  Պարուրյանը հանդերձարանում լսել է, թե ինչպես է Ահարոնյանը մեկ այլ աշխատողի ասել, թե ինչպես է իբրև ինքը ականջ դրել նրանց խոսակցությանը։ Այդ օրը  Պարուրյանը շատ է բարկացել և որոշել է այլևս չաշխատել այդտեղ։ Փոխելով հագուստը՝ ցանկացել է հեռանալ աշխատավայրից, սակայն Ահարոնյանի հանդեպ ունեցած բարկությունն իրեն հանգիստ չի տվել ու ցանկացել է հեռանալուց առաջ ինչ-որ կերպ պատժել վերջինիս։ Տարածքում մի մուրճ գտնելով` փնտրել և գործարանի հյութերի արտադրամասի տարածքում գտել է Ահարոնյանին ու, առանց որևէ  բառ ասելու,  մեկ անգամ մուրճով հարվածել է Ահարոնյանի գլխին՝ վերջինիս առողջությանը պատճառելով ծանր վնաս՝ կյանքին վտանգ սպառնացող, որից հետո հեռացել է գործարանի տարածքից։ Ահարոնյանը, տեսնելով մուրճով իրեն մոտեցող բանվորին, փորձել է պաշտպանվել, սակայն չի հասցրել, ուշագնաց է եղել:

Նախաքննությամբ պարզվել է, որ Պարուրյանը ծառայության ժամանակ բուժում է ստացել ՊՆ Երևանի կայազոր զինվորական հոսպիտալում: Սուր փսիխոզ ախտորոշմամբ Պարուրյանը զորացրումից 2 ամիս առաջ ազատվել է ծառայությունից: Դատահոգեբուժական եզրակացության համաձայն`  նա տառապում շիզոֆրենիա հոգեկան հիվանդությամբ, հանցանքը կատարելու պահին չի գիտակցել  արարքի ծանրությունը: Ըստ այդմ` որոշվել է նրան մեղսունակ ճանաչել:

Մալաթիա-Սեբաստիա ընդհանուր իրավասության դատարանի որոշմամբ` Պարուրյանը տեղափոխվել է Նուբարաշենի բժշկական կլինիկայի հատուկ տիպի բաժանմունք:

Դատաքննության ընթացքում գործարանի աշխատակից վկաները պնդում էին, որ երբևէ չեն լսել Հովհաննեսի հոգեկան խնդիրների մասին,  չեն ծաղրել նրան: Իսկ փորձարկողի հետ ունեցած  տարաձայնությունների մասին լսել են խոսակցություններից:Իսկ տուժողը պնդում է, որ որևէ հակակրանք չի տածել ամբաստանյալի նկատմամբ, նրան երբևէ չի ծաղրել:

Այսօրվա նիստում մեղադրող դատախազը և պաշտպանը միջնորդեցին դատարանին ազատել Պարուրյանին քրեական պատասխանատվությունից և  հարկադիր բուժման ուղարկել հատուկ հոգեբուժարան: Միջնորդության դեմ ոչ ոք չառարկեց,  թեև նիստերի դահլիճից դուրս խոսակցություններում տուժողի եղբայրն ու ընկերներն ասում էին, որ նա հասարակության համար վտանգավոր է և հնարավոր է` հոգեբուժարանից դուրս գալուց հետո մեկ ուրիշին էլ վնասի: Տուժող կողմը նաև վիրավորված էր մեղադրյալի հարազատներից, ովքեր ոչ մի անգամ չեն հետաքրքրվել 2 վիրահատություն տարած Ահարոնյանի առողջական վիճակով:

Ինչևէ,  դատարանը վճռեց Պարուրյանին հարկադիր բուժման ենթարկել: Գիշերային մղձավանջներից տառապող և մահացած մոր հիշողություններով ապրող տղան այսուհետ կանցկացնի հոգեբուժարանում: Իսկ թե ով էր ծաղրել տղային և ինչու, այդպես էլ մնաց անհայտ. տղան այդ մասին չի ցանկանում այլևս խոսել: