Իմ երգն իմ բողոքն է. Սիրուշո

Վերջերս երգչուհի Սիրուշոն հանդիսատեսի դատին հանձնեց իր նոր ստեղծագործությունը` «Պռեգոմեշ» անվամբ: Ըստ Սիրուշոյի` երգը գրելիս ոգեշնչվել է Կոմիտասի «Լոռվա գութաներգից»: Երգի` համացանցում հայտնվելու պես, այն բուռն քննարկման առիթ դարձավ: Շատ եղան նաև բացասական կարծքիներն ու քննադատությունները: 

Այս ամենին հավանաբար վերջ տալու համար Սիրուշոն քիչ առաջ Facebook-ի իր պաշտոնական էջում նշել է պատճառները, թե ինչու է հանդես եկել նման ստեղծագործությամբ:

«Կյանքը մեզ ամեն քայլափոխի տալիս է ոգեշնչվելու հնարավորություն, պարզապես պետք է նկատել այդ պահերը: Վերջերս, երբ Կոմիտաս էի լսում, «Լոռվա Գութաներգ»-ի մեջ ինձ մի հատված այնքան ոգեշնչեց, որ մի ակնթարթում մտովի լսեցի իմ նոր վերջնական երգը և պատկերացրեցի տեսահոլովակը: Հիմա պետք էր այս ամենը հերթականությամբ իրականացնել, իսկ ինձ մոտ այդ հերթականությունը չի սահմանափակվում գործիքավորում, խոսքեր և ձայնագրում պրոցեսով: Սկսեցի ուսումնասիրել «Լոռվա Գութաներգ»-ի հետ կապված գրեթե բոլոր նյութերը, ընթերցեցի Կոմիտասի գրած վերլուծությունը այս երգի շուրջ, հանդիպեցի մարդկանց, ովքեր քաջածանոթ են վարպետի ստեղծագործություններին և դրանց ծագմանը: Մասնագետների, ովքեր առհասարակ դեմ են Կոմիտասի երաժշտության ժամանակակից ներկայացմանը և փորձեցի հասկանալ` ինչու: Չնայած նրան, որ չէի պատրաստվում նորովի ներկայացնել Կոմիտասի աշխատանքը, այլ այն ուղղակի իմ ոգեշնչման աղբյուրն էր հանդիսացել, ամեն դեպքում ինձ համար շատ կարևոր էին բոլոր ուսումնասիրություններս: