Շրջիկ ատամնաբուժարան` Լոռու մարզում

ՀՀ առողջապահության նախարար Հարություն Քուշկյանը երեկ այցելել է Վանաձոր` մասնակցելու Ֆրանսիայի Հայ բժիշկների միության (UMAF) կողմից Լոռու մարզին ատամնաբուժական մեքենա նվիրաբերելու արարողությանը:

Ատամնաբուժական մեքենայի բացման արարողությունից հետո առողջապահության նախարարն ու Լոռու մարզպետը ծանոթացել են մեքենայի հնարավորություններին և նախատեսվող աշխատանքների ծավալին:

Նշենք, որ մեքենան Mitsubishi մակնիշի է (7 մ երկ.),  ներառում է ատամնաբուժական աթոռ, թվային ռենտգեն սարք, ախտորոշման սարք, գործիքների լվացման և ախտահանման խցիկ` համալրված անհրաժեշտ սարքավորումներով: Շրջիկ ատամնաբուժարանն ունի նաև ընդունարան` հիվանդներին գրանցելու համար:

Մեքենայի վարորդը, ատամնաբույժը և բուժքույրը Հայաստանից են, սակայն առաջնորդվելու են միջազգային, մասնավորապես` ֆրանսիական չափորոշիչներով: Վերապատրաստումը կազմակերպվելու է տեղում:

Շրջիկ ատամնաբուժարանը սպասարկելու է Լոռու մարզի 113 համայնքի այն ազգաբնակչությանը, ովքեր կարիք ունեն նմանատիպ բուժօգնության, սակայն որոնց հասու չէ ստոմատոլոգիական բուժօգնությունը: Նախաձեռնության կազմակերպիչները առանձնահատուկ ուշադրություն են դարձնելու գյուղական բնակչությանը, հիմնականում` երեխաներին և ծերերին: