Նանսենը եւ հայերը

Նոյեմբերի 6-ին Հաագայի «Աբովյան» մշակութային միությունում տեղի է ունեցել «Ֆրիտյոֆ Նանսենը եւ հայերը» խորագրով հոբելյանական միջոցառումը` նվիրված մեծ գիտնականի եւ մարդասերի ծննդյան 150-ամյակին:

ՀՀ ԱԳՆ մամլո ծառայությունից տեղեկացնում են, որ հոբելյանական միջոցառմանը ելույթով հանդես է եկել Նիդերլանդներում Հայաստանի դեսպան Ձյունիկ Աղաջանյանը, ով կարեւորել է Նանսենի կատարած աշխատանքը` որպես փախստականների հարցերով առաջին հանձնակատարի:

«Հնարավոր չէ ավելի լավ գնահատել Նանսենի կատարած աշխատանքը, քան Ամենայն Հայոց կաթողիկոս Գարեգին Ա-ի խոսքերով. «Ֆրիտյոֆ Նանսենի գործն Ավետարանի մարդկային թարգմանությունն է»,- ասել է դեսպանը:

Միջոցառմանը մասնակցել է նաեւ փիլիսոփա, լրագրող Հայկո Եսայանը, ում ընտանիքը նույնպես Հոլանդիա է ներգաղթել նանսենյան անձնագրով:

Նոյեմբերի 9-ին էլ Հայաստանում կնշվի մեծ հումանիստի 150-րդ տարեդարձը: Ալ. Սպենդիարյանի անվան օպերայի եւ բալետի ազգային ակադեմիական թատրոնում տեղի կունենա համերգ. սիմֆոնիկ նվագախումբը հանդես կգա նորվեգացի դիրիժոր Թերյե Միկելսենի եւ շեփորահար Թորմոդ Ասգարդի հետ: