Տիգրան Կարապետյանը որոշել է այլընտրանք դառնալ

Ժողովրդական կուսակցությունն առաջիկա խորհրդարանական ընտրություններին միայնակ է գնալու. այսօր լրագրողներին հայտնեց կուսակցության առաջնորդ Տիգրան Կարապետյանը:

Նա հայտարարեց, որ իրենք որոշել են այդ ընտրություններում այլընտրանքը դառնալ: «Կա մի մեծ զանգված, որը չի ընդունում Սերժ Սարգսյանին, կա մի զանգված, որը չի ընդունում Լեւոն Տեր-Պետրոսյանին: Եթե մենք կարող ենք լինել այլընտրանք, ինչո՞ւ չօգտագործենք դա»,- ասաց ԺԿ նախագահը:

Տ. Կարապետյանը նշեց, որ  ինքը ՀԱԿ-ին միանալու մասին ոչինչ չի հայտարարել, ինքը նշել է, որ միանալու է ժողովրդին եւ կատարել է իր խոստումը. Կոնգրեսի վերջին հանրահավաքի ընթացքում եղել է ժողովրդի մեջ:

ԺԿ առաջնորդի պնդմամբ` ինքը տեղեկություն ունի, որ ՀԱԿ-ին խորհրդարանական ընտրությունների ընթացքում 17-18 մանդատ է խոստացվել: Իսկ Կոնգրեսի պայքարն այլեւս ըմբոստ եւ անկանխատեսելի չէ, եւ ամեն ինչ համակարգվում է: «Իրենք են համակարգում, սցենար ունեն, ռեժիսոր ունեն, ամեն ինչ ցուցակագրված է` ով է խոսելու, ինչի մասին է խոսելու, ինչքան»,- ասաց Տ. Կարապետյանը` հավելելով, որ ինքը կցանկանար ժողովրդի կողմից ինքնաբուխ պոռթկում տեսնել:

«Իշխանությունը հաշվարկ ա, ընդդիմությունը հաշվարկ ա, բա մենք ո՞ւր գնանք, մանավանդ, որ իրենց հաշվարկների մեջ չենք տեղավորվում»,- ասաց նա` հավելելով, որ  ընդդիմադիր ուժերը պետք է միավորվեն. «Ազատության հրապարակը պետք է կոչվի միավորման հրապարակ, եւ միասնաբար պետք է պայքար մղվի այս համակարգի դեմ` հանուն հայ ժողովրդի»: