ՀՀԿ-ն կենտրոնացնում է իր ռեսուրսը... հրաժարականներո՞վ

Ընթացիկ գործընթացները, «Նոր ժամանակներ» կուսակցության առաջնորդ Արամ Կարապետյանի բնորոշմամբ, օրինաչափ են: Նրա խոսքով` Հայաստանը մտնում է նախընտրական փուլ, եւ պարզ է, որ իշխանությունը, ի դեմս կոալիցիայի, կենտրոնացնում է ամեն ինչ, որպեսզի կարողանա այդ փուլն անցկացնել իր համար հնարավորինս օգտավետ: Թե' վերջին պաշտոնանկությունները, թե' կոալիցիայի առաջիկա վայրիվերումները, ըստ նրա, միտված են այդ ռեսուրսների ամրացման գործընթացին:

«Շատ հանգիստ, մեզ համար հասկանալի պրոցես է, ինչ-որ նոր բան չկա, մեկ-մեկ լինում են անհասկանալի դեպքեր, ինչպես Կարեն Կարապետյանի հրաժարականն էր, բայց ընդունենք մարդկանց բացատրությունը, որ անձնական խնդիրներ կան կյանքում»,- լրագրողների հետ այսօրվա հանդիպման ժամանակ ասաց Կարապետյանը ` հավելելով, որ Կարեն Կարապետյանի հրաժարականն ու Տարոն Մարգարյանի նշանակումը խոսում է այն մասին, որ ՀՀԿ-ն ապագա ընտրություններից առաջ Երեւանում կենտրոնացնում է իր ռեսուրսը:

Ասուլիսին մասնակից ԱԺ ՀՀԿ խմբակցության պատգամավոր Արտակ Դավթյանն էլ հավելեց, որ կյանքն ավելի գունեղ է եւ բազմազան, քան այն, ինչ պլանավորվում եւ ենթադրվում է: Պարզապես, նախընտրական ժամանակաշրջանի հետ կապված, այդ զարգացումներն ավելի սուր են ընկալվում:

«Մարդիկ, ովքեր իրենց դիմումի համաձայն ազատվել են պաշտոններից, արդեն տվել են համապատասխան մեկնաբանություններ, ես որեւիցե հավելելու բան չունեմ»,- չցանկանալով մեկնաբանել վերջին պաշտոնանկությունններն ու հրաժարականնները` ասաց հանրապետական պատգամավորը` միայն նշելով, որ ինքը`որպես Արտակ Դավթյան, հարգանքով է վերաբերվում քաղաքապետի որոշմանը: