ՀԱԷԿ-ում գրանցվել է առավելագույնը 2-3 բալ ուժգնությամբ երկրաշարժ

Հայկական ատոմակայանը ոչ միայն չի վնասվել, այլեւ այնտեղ աշխատող անձնակազմն ընդհանրապես չի էլ զգացել երկրաշարժը. անդրադառնալով Թուրքիայի ատոմային էներգիայի կազմակերպության տարածած հաղորդագրությանը, թե Վանում տեղի ունեցած երկրաշարժի հետեւանքով վնասվել է Հայաստանի ատոմակայանը, yerkir.am-ին հայտնեց Միջուկային անվտանգության կարգավորման պետական կոմիտեի նախագահ Աշոտ Մարտիրոսյանը:

Նրա խոսքերով` Հայկական ԱԷԿ-ը հաշվարկված է 9 բալի համար, իսկ երեկ ատոմակայանի կառույցում սարքերը գրանցել են առավելագույնը 2-3 բալ ուժգնություն, որը ոչ մի կերպ չէր կարող ազդել ատոմակայանի անվտանգության վրա:

«Սա հերթական անհիմն ապատեղեկատվությունն է»,- նշեց Ա. Մարտիրոսյանը:

Ավելի վաղ այս տեղեկատվությունը հերքել էին նաեւ ՀՀ արտակարգ իրավիճակների եւ էներգետիկայի նախարարությունները` տեղեկացելով, որ Վանում տեղի ունեցած երկրաշարժը մեր ատոմակայանի վրա որևէ կերպ չի ազդել, եւ աշխատանքներն ընթանում են բնականոն հունով: