Սկսվում է աշխատանքների ամենաբարդ և վտանգավոր փուլը

Այսօր առավոտյան ժամը 8­-ից որոնողափրկարարական աշխատանքները սողանքային գոտում ավելի ինտենսիվ են դարձել` ևս 60 հրշեջ­-փրկարար է ժամանել Երևանից, 15-­ը` Հրազդանի ՋԷԿ­-ից, 15­-ը` Սևանի հատուկ ջրափրկարարական ջոկատից: Ընդհանուր առմամբ, այս պահին սողանքային գոտում  աշխատում է 200 հրշեջ-­փրկարար:

ԱԻ նախարարությունից տեղեկացնում են, որ, շրջելով աշխատանքային բոլոր տեղամասերով, ԱԻ նախարար Արմեն Երիցյանն առավոտյան խորհրդակցության ժամանակ փրկարարների առջև խնդիր է դրել` ցուցաբերել առավելագույն զգոնություն, զգուշություն և աչալրջություն:

«Սկսվում է աշխատանքների ամենաբարդ և վտանգավոր փուլը: Ծանր տեխնիկայի ինտեսիվ ներգրավման հետ շեշտակի մեծանում է նոր սահքի և հողաշերտի վտանգավոր տեղաշարժի հնարավորությունը: Իմ շատ սիրելի' գործընկերներ, ձեզանից յուրաքանչյուրի կյանքը թանկ է ինձ համար: Ամբողջ ժողովուրդը հիմա մեզ է հետևում: Հոգնածության և դժվարությունների մասին հետո կխոսենք: Հիմա գործելու ժամանակն է: Մենք պատվով պիտի դուրս գանք այս փորձությունից: Մեր կոչումն ամենադժվար պահին մարդկանց կողքին լինելն է»,­- նշել է ԱԻ նախարար Արմեն Երիցյանը:

Ներկա պահին աշխատանքներ են տարվում երևացող վերջին`23­-րդ ավտոմեքենան դուրս բերելու ուղղությամբ: Հողաշերտի տակ, ըստ օպերատիվ տվյալների, դեռ մնում է 4-5 մեքենա:

Անհայտ կորածների թիվը նույնն է `5: