ՊԵԿ նախագահը լուրջ կասկածներ ունի, որ հարկերը կհավաքվեն

ՀՀ ֆինանսների փոխնախարար Պավել Սաֆարյանը, կառավարության այսօրվա նիստում ներկայացնելով 2012 թ. բյուջեի նախագիծը, նշեց, որ 2012 թ. պետական բյուջեի եկամուտները կկազմեն 910 մլրդ դրամ, որի 96 տոկոսից ավելին հարկային եկամուտներն են:

Նրա մեկնաբանմամբ` դա նշանակում է, որ ծախսային հիմնական մասը կկատարվի ներքին ռեսուրսների` հարկային մուտքերի հաշվին: Ըստ փոխնախարարի` այս տարվա համեմատ` 100 միլիարդից ավելի ներքին եկամուտներ կլինեն:

«Բյուջեի եկամուտների կատարումը պետք է դիտարկել ոչ թե միայն ՊԵԿ-ի խնդիրը, այլ ողջ կառավարության: Գերատեսչությունները պետք է մտածեն իրենց ոլորտներում եկամուտների ավելացման մասին»,- ասաց ա:

«Հայաստանի պատմության մեջ հարկային եկամուտների նման աճ չի նախատեսվել, այն էլ` ճգնաժամային շրջանում: Շատ լուրջ կասկածներ ունենք, որ այդ հարկերը կհավաքվեն»,- Սաֆարյանին արձագանքեց ՀՀ կառավարությանն առընթեր պետեկամուտների կոմիտեի նախագահ Գագիկ Խաչատրյանը:

Ըստ նրա` բյուջեի ներկայացված նախագծում եկամուտների բարձրացումը բավականաչափ հիմնավորված չէ:

Վարչապետ Տիգրան Սարգսյանն էլ նշեց, որ հարկային բազան ավելացնելուն ուղղված միջոցառումներում կառավարությունը պետք է շատ զգուշավոր լինի, որպեսզի չհարվածի տնտեսական աճին: «Այնպես որ` 2012 թվականին մեր առջև բարդ խնդիր է ծառացած, և մենք պարտավոր ենք հաղթահարել այն»,- հավելեց Տ. Սարգսյանը։