Տակից վաճառելու խասյաթ

Սեպտեմբերի 23-ի ասուլիսում Ֆուտբոլի ֆեդերացիայի նախագահ Ռուբեն Հայրապետյանն ամենևին լրջություն չտվեց այն լուրերին, թե Հայաստան-Մակեդոնիա հանդիպման տոմսերը սպառված են, և փոխարենը հայտնեց, որ դեռևս չսպառված 3000 տոմս կա:

Այսօր` սեպտեմբերի 27-ի դրությամբ, արդեն հնարավոր չէ օրինական ճանապարհով ձեռք բերել վերոնշյալ խաղի տոմսերը. «Հանրապետական» մարզադաշտի տոմսարկղը փակ է:

Սակայն, ի տարբերություն տոմսարկղի, ակտիվ գործունեություն են ծավալում վերավաճառողները: Տոմսարկղին մոտեցող յուրաքանչյուրին առաջարկվում են խաղի տոմսեր: Արևմտյան տրիբունայից ֆուտբոլ դիտել ցանկացողներին հիասթափություն է սպասում, քանի որ, ըստ վերավաճառողների, այդ տրիբունայի տոմսերի մեծ մասն ի սկզբանե բաժանվել է «վերևներին», իսկ վաճառքի հանված շատ քիչ քանակությունը սպառվել է ժամերի ընթացքում. սև շուկայում դրանք ձեռք բերելն անհնար է:

Yerkir.am-ի տվյալների համաձայն` այժմ հնարավոր է գնել միայն հյուսիսային, հարավային և արևելյան տրիբունաների տոմսեր: Փաստորեն, պաշտոնապես` տոմսերը սպառված են, իսկ ոչ պաշտոնապես` շտապեք ձեռք բերել Հայաստան-Մակեդոնիա հանդիպման տոմսերը «Հանրապետական» տոմսարկղի ՄՈՏԻՑ: