Բնակարան` Շիրակի փոխմարզպետին

Շիրակի մարզպետի տեղակալ Սեյրան Պետրոսյանը այսուհետև Գյումրիում ծառայողական բնակարան կունենա: Նման որոշում է կայացրել ՀՀ կառավարությունը` սեպտեմբերի 1-ին կայացած նիստում: Ի դեպ, Շիրակի մարզպետի տեղակալին 3 սենյականոց բնակարան է հատկացվել Գյումրիում երկրաշարժի հետևանքով անօթևան ընտանիքների համար կառուցվող բազմաբնակարան շենքերից մեկում, թեև վերջինս անօթևանի կարգավիճակ չունի:

Նույն որոշմամբ` Գյումրի քաղաքում կառուցվող բազմաբնակարան շենքերից պետական սեփականություն հանդիսացող մեկ 3-սենյականոց բնակարան դասվել է պաշտոնական (ծառայողական) բնակարանների շարքը և հանձնվել Հայաստանի Հանրապետության կառավարությանն առընթեր պետական գույքի կառավարման վարչության տնօրինությանը` Հայաստանի Հանրապետության օրենսդրությամբ սահմանված կարգով հաշվառումն ապահովելու և այն` որպես ծառայողական բնակարան, Հայաստանի Հանրապետության Շիրակի մարզպետի տեղակալ Սեյրան Պետրոսյանին հատկացնելու համար:

ՀՀ կառավարության վերոհիշյալ որոշման հիմնավորման մեջ ասված է. «ՀՀ Շիրակի մարզպետի տեղակալ Սեյրան Պետրոսյանը մարզում ղեկավար պաշտոններ զբաղեցնում է Հայաստանի Հանրապետության անկախության առաջին տարիներից: Աշխատանքային կենսագրությունը կապելով հայրենի տարածաշրջանին` սկզբում Աշոցքի շրջխորհրդի գործադիր կոմիտեի նախագահի, հետո` մարզպետարանների ստեղծման առաջին օրից մարզպետարանի քարտուղարի, այնուհետև մարզպետի տեղակալի, շուրջ 9 ամիս մարզպետի պաշտոնակատարի պաշտոններում աշխատելով, Ս.Պետրոսյանը իրավամբ իր գործունեությամբ ուրույն ներդրում է ունեցել երկրաշարժի հետևանքների վերացման, մարզի տարածքային կառավարման և տեղական ինքնակառավարման մարմինների կայացման և համաչափ զարգացման բարդ գործում: Անձամբ ներգրավված լինելով, ավելին, մեծամասամբ անձամբ ղեկավարելով քաղաքացիներին բնակարաններով ապահովման գործընթացները, նա առ այսօր չունի բնակարան և ապրում է վարձով»: