Սենսացիոն հայտարարություն ՀՀ ՔԳ վերաքննիչ դատարանում

Այսօր ՀՀ քրեական գործերի վերաքննիչ դատարանում լսվել է ՀՀ Մաքսային պետական կոմիտեի նախկին նախագահ Արմեն Ավետիսյանի տան վրա ավազակային հարձակման գործով բողոքը: Սենսացիոն հայտարարություն է արել Երևանի ոստիկանության  Խորհրդային բաժնի նախկին պետ, հանցավոր խմբի անդամ, նույն գործով ամբաստանյալ Արմեն Նիկողոսյանը:

Ըստ նրա ցուցմունքի` Արմեն Ավետիսյանի տան վրա ավազակային հարձակման կազմակերպիչը Արա Կարապետյանն է (Կոշիկի Արա), ով, ըստ Նիկողոսյանի, «անձնական հաշիվներ է ունեցել Արմեն Ավետիսյանի հետ և խոստացել է, որ նրան կստորացնի իր ընտանիքի ներկայությամբ»: Ամբաստանյալի խոսքերով` մի անգամ, երբ ինչ-որ առիթով ընկերներով հավաքված են եղել, Արմեն Ավետիսյանը Արա Կարապետյանի հետ նարդի խաղալիս լուրջ վեճ է բռնվել, դրանից հետո Կոշիկի Արան խոստացել է վրեժխնդիր լինել:

Հիշեցնենք, որ Երևանի ոստիկանության  Խորհրդային բաժնի նախկին պետ Արմեն Նիկողոսյանը ազատվել էր զբաղեցրած պաշտոնից 2008 թ. մարտի 1-ի դեպքերից հետո, երբ հայտնի էր դարձել, որ նա տեղեկացրել էր ցուցարարներին ոստիկանությունում  ընդհանուր տագնապ հայտարարելու մասին: