Եվս մեկ անդրադարձ մշակութային օրենսդրությանը

ՀՀ մշակույթի նախարար Հասմիկ Պողոսյանն երեկ ընդունել է ՀՀ-ում ԱՄՆ գործերի ժամանակավոր հավատարմատար Բրյուս Դոնահյուին:

Տիկին Պողոսյանը կարևորել է մշակութային արժեքների պահպանության ԱՄՆ դեսպանի հիմնադրամի կողմից Գառնու միջնադարյան կամրջի ամբողջական վերականգնման ու ամրակայման ծրագրին մշակութային դրամաշնորհի տրամադրումը` հավելելով, որ 11-րդ դարի այդ կամուրջը Հայաստանի միջնադարյան ճարտարապետության ինժեներական նշանակություն ունեցող եզակի կառույցներից է:

ՀՀ-ում ԱՄՆ գործերի ժամանակավոր հավատարմատար Բրյուս Դոնահյուն նախարարին տեղեկացրել է, որ սա առաջին դրամաշնորհային ծրագիրը չէ, որ իրենք իրականացնում են (եղել է աջակցություն ազգագրական համույթի, ֆիլմադարանի, հուշարձանի բարեկարգման), սակայն լիազոր մարմնի հետ ու ծավալային առումով առաջին խոշոր համագործակցությունն է, որը պետք է նաև ամրագրվի համաձայնագրի ստորագրումով:

Կողմերն անդրադարձել են նաև մշակույթի տարբեր ոլորտներին (թանգարան, գրադարան, կինո), ինչպես նաև մշակութային օրենսդրությանը: Նախարարը հյուրին ներկայացրել է նաև ՅՈՒՆԵՍԿՕ-ի կողմից 2012 թ. «Երևանը գրքի համաշխարհային մայրաքաղաք» հռչակելու և հայ տպագիր գրքի 500-ամյակին նվիրված կարևորագույն մի շարք ծրագրեր և վստահություն է հայտնել, որ ԱՄՆ դեսպանությունը ևս մասնակցություն կունենա դրանցում:

ԱՄՆ գործերի ժամանակավոր հավատարմատար Բրյուս Դոնահյուն հավաստիացրել է ծրագրերի վերաբերյալ իրենց հետաքրքրությունը և նշել, որ մասնակցություն կբերեն նաև Հայաստանի անկախության 20-ամյակի միջոցառումներին, որը նաև Հայաստան-ԱՄՆ համագործակցության 20-ամյակն է: