Դեմ է Հանրապետության հրապարակում հյուրանոց կառուցելուն

Հանրապետության հրապարակում կառուցվող հյուրանոցի խնդրի վերաբերյալ այսօր լրագրողների հետ իր մտահոգությունները կիսեց Հայաստանի ճարտարապետների միության նախագահ Մկրտիչ Մինասյանը:

Ըստ նրա՝ մայրաքաղաքի կենտրոնում այլևս բաց հարթակներ չկան, սակայն չպետք է` մի բան քանդելով կառուցել նորը: Ինչ վերաբերում է Հանրապետության հրապարակին, ապա նախկինում այդ տարածքի հետ կապված կառուցապատման բազմաթիվ առաջարկներ են եղել, սակայն Մկրտիչ Մինասյանը նշում է, որ այդտեղ որևէ կառույց չի կարող լինել, քանի որ տարածքը ծանրաբեռնված է:

«Մետրոն գլխավոր պողոտայի հետ պետք է լինի համալիր և նպաստի քաղաքացիների հանգստին»,- նշեց ճարտարապետը՝ հավելելով, որ քաղաքը ոչ միայն շինություններն են,այլև բաց տարածքները, որտեղ քաղաքացիներն իրենց փոքր-ինչ ազատ կզգան:

Նշենք, որ յոթ հարկանի և չորս աստղանի հյուրանոցը կառուցելու առաջարկը եղել է ՀՀ գլխավոր ճարտարապետ Նարեկ Սարգսյանի կողմից: Սակայն Ճարտարապետների միության նախագահը փաստում է, որ մետրոյի վերեւում հյուրանոց կառուցելը, որը կդիմադրի հինգ րոպե հաճախությամբ ցնցումներին, խելամիտ չէ, նաեւ քաղաքի այդ հատվածը հյուրանոց կառուցելու համար հարմար վայր չէ: