Ճապոնիայի կառավարությունը հրաժարական է տալիս

Ճապոնիայի կառավարությունն ամբողջ կազմով հրաժարական է տալու օգոստոսի 30-ին, որպեսզի  տեղը զիջի իշխող Դեմոկրատական կուսակցության ձեւավորած նոր կաբինետին. այսօր իր գործընկերներին հայտարարել է երկրի վարչապետ Նաոտո Կանը:

«Ես կհեռանամ այն բանից հետո, երբ կատարվեն 3 պայմաններ»,- հայտարարել է նա:

Ընդդիմության եւ կառավարող կուսակցության ազդեցիկ ուժերի ճնշման տակ Կանն ավելի վաղ էլ հրաժարական տալու պատրաստակամություն է հայտնել, սակայն մի շարք պայմանների կատարման դեպքում, առաջին հերթին` երկրի ֆինանսական դրությունը բարելավող մի շարք օրինագծերի եւ աղետալի երկրաշարժի ու ցունամիի հետեւանքների վերացման միջոցառումների ընդունման պայմանով:

Վերջին շրջանում վարչապետի վարկանիշն ընկնում է, քանի որ ընտրողները համարում են, որ նա անհետեւողական է, հապշտապ որոշումներ է կայացնում, սխալներ է թույլ տվել երկրաշարժի եւ «Ֆուկուսիմա-1» ատոմակայանի վթարի հետեւանքների վերացման ընթացքում: Ներկայումս նրան պաշտպանողների թիվը չի անցնում 15 տոկոսից: