Հիմի՞ էլ լռենք, եղբայրք, հիմի՞ էլ

«Չենք լռելու» երիտասարդական նախաձեռնությունը խիստ մտահոգված է «Խղճի և կրոնական ազատությունների մասին» ՀՀ օրենքի` արդարադատության նախարարության կողմից շրջանառության մեջ դրված նախագծով, որում տեղ չեն գտել մի շարք կարևոր խնդիրների կանոնակարգումներ, ինչպես նաև առկա են բազմաթիվ ոչ հստակ ձևակերպումներ:

Ինչպես տեղեկացնում են նախաձեռնությունից, նախագիծը դեռևս գտնվում է քննարկման փուլում` ՀՀ կառավարությունում: «Չենք լռելու»-ն այժմ պատրաստում է ապագա օրենքում տեղ գտած դրույթների վերաբերյալ հարցադրումների փաթեթ, որը կներկայացվի մոտակա օրերին:

Որպես քննարկվող օրինագծում տեղ գտած անհեթեթությունների վառ օրինակ` կարելի է բերել կրոնական կազմակերպության գրանցման համար անհրաժեշտ անդամների նվազագույն թվի սահմանված շեմը` ընդամենը 25 հոգի: Այդ տրամաբանությամբ, օրինակ, «Չենք լռելու»-ն իր 1100 անդամներով կկարողանա գրանցել 40-ից ավելի, այսպես կոչված, «կրոնական կազմակերպություն», որոնցից յուրաքանչյուրն իր կարգավիճակով կհավասարվի Հայ Առաքելական եկեղեցուն:

«Չենք լռելու» նախաձեռնությունը արդարադատության նախարարության կողմից դրսևորվող վերաբերմունքը օրինագծի նկատմամբ, որում առհասարակ բացակայում է ազգային շահի գերակայության հասկացությունը, համարում է անհասկանալի և չափազանց վնասակար:

Օրինագծի վերաբերյալ հարցադրումների փաթեթն ամբողջությամբ կներկայացվի հասարակությանն ու ՀՀ կառավարությանը առաջիկա օրերին: