Ով ումից պետք է ներողություն պահանջի

Անկարայի կողմից նախագահ Սերժ Սարգսյանի հասցեին հնչեցված քննադատություններին է անդրադարձել  իսրայելական Jerusalem Post պարբերականը` մեջբերելով  Իսրայելի արտգործնախարարության մի պաշտոնյայի, որը քննադատել է Թուրքիայի վարչապետ Ռեջեփ Թայիփ Էրդողանին` ասելով. «Իսկ ո՞վ պետք է Էրդողանից ներողություն պահանջի Կիպրոսի հյուսիսային հատվածն օկուպացնելու համար»։

Ըստ պարբերականի` պաշտոնյան հիշեցրել է անցած տարի «Ազատության նավատորմիղի» միջադեպի պատճառով Անկարայի՝ Թել Ավիվին առաջադրած նախապայմանները և  գրում է, որ Իսրայելն այլևս աշխարհում միակ երկիրը չէ, որից Թուրքիան ներողություն է պահանջում։

«Էրդողանը ևս մեկ ներողություն է պահանջում, այս անգամ՝ Հայաստանից»,- գրել է  պարբերականը։