Ուսանողներին առաջարկել են հաստատվել Արցախում

Երեկ ԼՂՀ վարչապետ Արա Հարությունյանը հանդիպել է «Լույս» հիմնադրամի աջակցությունը վայելող մի խումբ ուսանողների հետ` հիմնադրամի կրթական ծրագրի տնօրեն Ժաքլին Կարաասլանյանի գլխավորությամբ:

Ինչպես հայտնում է կառավարության տեղեկատվության եւ հասարակայնության հետ կապերի վարչությունը, վարչապետը ողջունել է աշխարհի ճանաչված բուհերում սովորող հայ երիտասարդներին (4-ը` ԼՂՀ-ից) Արցախում գտնվելու եւ «Լույս»-ի ծրագրերն այստեղ եւս իրականացնելու կապակցությամբ, բարձր գնահատել երիտասարդների` ուսման նկատմամբ սերն ու ձգտումը, կարեւորել ձեռք բերած գիտելիքներն ի նպաստ հայրենիքին օգտագործելը:

Վարչապետի խոսքով` ԼՂՀ-ում կադրերի լուրջ խնդիր կա գրեթե բոլոր բնագավառներում: Նա ուսանողներինառաջարկել է ուսումն ավարտելուց հետո հաստատվել Արցախում` իհարկե, համապատասխան պայմանների առկայությամբ:

Իր գործունեության երկու տարվա ընթացքում «Լույս» հիմնադրամը հոգացել է հարյուրավոր հայ ուսանողների ուսման վարձը: Միայն այս տարի հիմնադրամի հովանավորությամբ աշխարհի մի շարք առաջատար բուհերում սովորում են 200-ից ավելի ուսանողներ: