Յուրօրինակ հագուստ

Չինաստանում տարօրինակ մրցույթ է անցկացվել, որի պայմանների համաձայն` մեղվապահները պետք է իրենց մարմնին որքան հնարավոր է շատ մեղուներ կրեին: Ինչպես հաղորդում է Xinhua գործակալությունը, մրցույթը տևել է մոտ 1 ժամ, մասնակցել է ընդամենը երկու մարդ:

Հաղթող է ճանաչվել 42-ամյա Վան Դալինը, որին հաջողվել է 26 կգ մեղվից բաղկացած «հանդերձանք» կրել. մեղուները պատել են նրա ողջ մարմինը՝ ծածկելով նույնիսկ գլուխը: Դալինի մրցակիցը նրանից հետ է մնացել 3 կգ մեղվով:

Ի դեպ, որպեսզի մեղուները հավաքվեն մասնակիցների մարմիններին, նրանց «գայթակղել են» մայր մեղուներով:

Այս մրցավեճի համաշխարհային ռեկորդը պատկանում է ամերիկացի Մուրակ Բյանկանելլոյին, որը 1998-ին մարմնին կրել է 39.4 կգ մեղու: Ռեկորդը գրանցվել է Գինեսի գրքում: