Առաջընթաց հնարավոր է, եթե Ադրբեջանը հրաժարվի 10 փոփոխությունից

Այսօր կարճատեւ աշխատանքային այցով Երեւանում գտնվող ՌԴ արտգործնախարար Սերգեյ Լավրովը ՀՀ նախագահ Սերժ Սարգսյանին է հանձնել ՌԴ նախագահ Դմիտրի Մեդվեդեւի անձնական ուղերձը Ղարաբաղյան հակամարտության կարգավորման վերաբերյալ:

Հանդիպմանը մասնակցել է նաեւ ՀՀ արտգործնախարար Էդվարդ Նալբանդյանը:

Ըստ ՌԴ ԱԳՆ կայքի` հանդիպման ժամանակ նշվել է, որ ԵԱՀԿ ՄԽ համանախագահող երկրների` ԱՄՆ-ի, Ֆրանսիայի եւ Ռուսաստանի նախագահները վճռական կարծիք են հայտնել, որ կողմերը շուտափույթ պետք է պատասխանատու որոշում կայացնեն: Սերժ Սարգսյանը խոստացել է մոտ ժամանակներս պատասխան տալ Դմիտրի Մեդվեդեւին:

Ինչպես տեղեկացնում է ՀՀ ԱԳՆ մամուլի եւ տեղեկատվության վարչությունը, հանդիպումից հետո երկու արտգործնախարարները ճեպազրույց են անցկացրել լրագրողների հետ:

Հարցին, թե մոտ ապագայում հնարավո՞ր է առաջընթաց Լեռնային Ղարաբաղի կարգավորմանն ուղղված հիմնարար սկզբունքների համաձայնեցման գործում, Էդվարդ Նալբանդյանը պատասխանել է. «Մենք հենց այդ մտադրությամբ՝ դրական տրամադրվածությամբ մեկնեցինք Կազան: Իսկ թե որքան է մոտ ապագայում հնարավոր նման համաձայնեցումը, ես կարծում եմ` եթե Ադրբեջանը հետ վերցնի իր փոփոխությունները` այն 10 փոփոխությունը, որոնք նա առաջ քաշեց Կազանում, ապա նման առաջընթացը հնարավոր կլինի»: