Հայաստանցի բժիշկները` Արցախում

Հայաստանյան բուժհաստատությունների մասնագետների այցը Արցախ արդեն ավանդույթ է դարձել:

Օրերս մի խումբ մասնագետներ այցելել են Շուշիի շրջանային հիվանդանոց: Երեւանի բժշկական համալսարանի միկրովիրաբուժության բաժնի վարիչ Արտավազդ Սահակյանի գլխավորությամբ Շուշի այցելած մասնագետները բաց դռների օր են կազմակերպել հանրապետության տարբեր շրջանների բնակիչների համար: Տեղի բժիշկների հետ հյուրերը կատարել են 57 վիրահատություն:

Նույն հիվանդանոցում տեղի է ունեցել նաեւ նորաստեղծ բիոքիմիական լաբորատորիայի բացման արարողությունը, որին մասնակցել է ֆրանսիացի բժիշկների խումբը: Լաբորատորիան կրում է «Բիոսեֆ» կազմակերպության ներկայացուցիչ, մեկ տարի առաջ իր մահկանացուն կնքած Քրիստիան Սեղեի անունը, ում հովանավորությամբ էլ ստեղծվել է լաբորատորիան:

Բժիշկների մի խումբ էլ օրերս գտնվում էր Մոր եւ մանկան առողջության պահպանման կենտրոնում, որտեղ Երեւանի հայ-ամերիկյան առողջության կենտրոնի կողմից կազմակերպվել են արտագնա հետազոտություններ: Կենտրոնի գործադիր տնօրեն Խաչանուշ Հակոբյանի տեղեկացմամբ` կենտրոնի մասնագետների այցն առաջին անգամ տեղի է ունեցել 1999-ին: Նա վստահեցրել է, որ այսուհետ այցելություններն ավելի հաճախակի կլինեն:

Ի դեպ, ԼՂՀ առողջապահության նախարարի հետ պայմանավորվածություն է ձեռք բերվել տեղի մասնագետներին վերապատրաստել Երեւանում: