Ամառային դպրոցը շարունակում է գործել

Ստեփանակերտում շարունակում է գործել «Արցախ» հասարակագիտական առաջին ամառային դպրոցը, որը նախաձեռնել եմ «Ամերիկացիներն Արցախի համար» ՀԿ-ն եւ Հայկական բարեգործական ընդհանուր միությունը:

Ամառային դպրոցի կազմակերպիչներից Համազասպ Դանիելյանը հիշեցրեց, որ այս կազմակերպությունն Արցախում կրթական զանազան ծրագրեր իրականացնելու փորձ ունի: Անցյալում ևս իրականացվել են դասընթացներ` թե’  ԼՂ կառավարության ներկայացուցիչների և  թե’ ուսանողների համար:

«Դասավանդողները մոտ 10-ն են, եւ թեմաների շրջանակն էլ բավական լայն է` արվեստաբանությունից, էթիկայից սկսած մինչեւ միջազգային հարաբերությունների տեսություն»,- ասաց նա:

Հաջորդ շաբաթ դասընթացները հիմնականում նվիրված են լինելու պատմության եւ քաղաքագիտության մեթոդաբանությանը: «Այսինքն` ծրագրի նպատակը ոչ թե նոր փաստական գիտելիքների հաղորդումն է, այլ ուսանողներին մեթոդաբանական գիտելիքների հաղորդումը, ինչպես նաեւ ծանոթացումը արեւմտյան երկրներում ընդունված պրակտիկային»,- ասաց Հ. Դանիելյանը:

Ծրագրի մասնակիցները 20-ն են` մեծ մասամբ ԼՂՀ բուհերում սովորող ուսանողներ, սակայն կան նաեւ հայաստանցիներ: