Չանցնել Ռուբիկոնը

«Արմատական» ընդդիմությունը մինչեւ Կազանի հանդիպումը թայմ աութ էր վերցրել բանակցություններում նախագահի դիրքերն ամրացնելու համար: Դրանից հետո ՀԱԿ-ից հնչող հայտարարությունները վկայում են, որ այդ դադարը վերցվել էր, որպեսզի Սերժ Սարգսյանն ավելի անկաշկանդ ստորագրի սկզբունքների փաստաթուղթը, որովհետև, ինչպես իրենք են համառորեն ուզում համոզել, դրա այլընտրանքը մեր պարտությամբ կանխորոշված պատերազմն է:

Բայց այդ դադարը որոշակի վստահություն հաղորդեց նախագահին և գուցե նաև ներքին կայունության այդ պաշարը դեր խաղաց, որ փաստաթուղթը չստորագրվեց: Բանակցային գործընթացի ապագայի շուրջ անորոշությունն ավելի է ընդգծվում, ինչն ավելի անհրաժեշտ է դարձնում ներքին կայունության պահպանումը:

ՀԱԿ-ի` այսօր կայանալիք հերթական հանրահավաքը տեղի է ունենալու հենց այս մարտահրավերի խորապատկերին: Մինչդեռ փաստաթուղթը գործող իշխանությունների ձեռքով շուտափույթ ստորագրված տեսնելու` արմատականների բաղձանքը թույլ է տալիս ենթադրել, որ խաղաքարտերը ներսից խառնելու խնդիր կարող է դրվել:

Հանրահավաք անցկացնելը, ամբիցիաներ առաջ մղելը, յուրաքանչյուր ուժի իրավունքն է: Բայց այն երբեք չպետք է հատի ազգային շահի սահմանագիծը: