ԱՄՆ-ը Ֆրանսիային թույլ չի տվել մասնակցել խաղաղ գործընթացին

Բարաք Օբամայի վարչակազմը երեկ վերսկսել է իսրայելա-պաղեստինյան հակամարտության խաղաղ կարգավորմանն ուղղված ջանքերը:

ԱՄՆ պետքարտուղար Հիլարի Քլինթոնը սառը ջուր է լցրել Ֆրանսիայի` բանակցությունները Փարիզում անցկացնելու առաջարկին` պատճառաբանելով, թե կողմերը երկխոսելու նշաններ ցույց չեն տալիս:

«Մենք դեռ սպասում ենք եւ հետեւում իրադրությանը, քանի որ ոչ մի երաշխիք չկա, որ կողմերից մեկը կվերսկսի բանակցությունները»,- Ֆրանսիայի արտգործնախարար Ալեն Ժյուպեի հետ հանդիպումից հետո հայտարարել է նա լրագրողներին:

Միաժամանակ, Իսրայելի փոխարտգործնախարար Դանի Այալոնը հանդիպել է իր ամերիկացի գործընկեր Բիլ Բեըրնսի հետ եւ հայտարարել, որ «ամերիկացիների միջնորդությամբ բանակցություններին այլընտրանք չկա»:

Փաստորեն, ԱՄՆ-ը պարզորոշ հասկացրել է, որ ֆրանսիացիների նախաձեռնությունը տեղին չէ: Իսրայելը նույնպես հակված է հրաժարվել Ֆրանսիայում բանակցություններ վարելու գաղափարից, իսկ Պաղեստինը դեմ չէ ընդունել այդ առաջարկը:

Այդուհանդերձ, արեւմտյան ԶԼՄ-ների տվյալներով, Պաղեստինը եւ Իսրայելը գաղտնի բանակցություններ են սկսել Վաշինգտոնում: Իսրայելի ներկայացուցիչ Իցհակ Մոլխոն եւ Պաղեստինի ներկայացուցիչներ Սաիբ Արիկաթն ու Նաբիլ Աբու Ռուդեյնեն ներկայումս  փորձում են վերսկսել խաղաղ բանակցությունները Սպիտակ տան հովանավորությամբ: