ԱՄՆ կառավարության էլեկտրոնային փոստը ջարդել են

Google ընկերությունը մեղադրում է չինացի հաքերներին` անօրինական կերպով հարյուրավոր օգտատերերի էլեկտրոնային փոստերը մուտք գործելու համար:

Ինչպես հաղորդում է Washington Post-ը, Google-ը հայտարարել է, թե էլփոստեր մուտք են գործել ոչ թե անվտանգության համակարգը խափանելու, այլ օգտատերերին խաբելու միջոցով:

Հաքերները դրա համար օգտագործել են fishing, այսինքն` երբ հայտնի կազմակերպության անունից բազմաթիվ նամակներ են ուղարկվում եւ խնդրում մուտքագրել իրենց փոստի հասցեն ու գաղտնաբառը, եւ այդ ինֆորմացիան ստանալուց հետո նրանք այդ փոստերը վերահասցեավորում են իրենց փոստերին:

Հայտարարվում է, որ հաքերները մուտք են ունեցել ԱՄՆ զինված ուժերի հրամանատարների եւ կառավարության անդամների, Չինաստանի, Հարավային Կորեայի եւ այլ ասիական երկրների քաղաքական ակտիվիստների եւ լրագրողների էլփոստեր:  

Google-ը պարզել է, որ հաքերական հարձակումը կատարվել է Ցզինան քաղաքից, որտեղ համակարգչային փորձագետների դպրոց է գործում:

Չինաստանն, իր հերթին, հերքել է, թե իր երկրից հաքերները կոտրել են ամերիկացի պաշտոնյաների փոստերը: «Չինաստանն այդ մեղադրանքներն ընդունել չի կարող»,- ասել է արտգործնախարար Խուն Լեյը:

Իսկ ԱՄՆ կառավարությունը հայտարարել է, թե բարձրաստիճան պաշտոնյաների փոստերը ջարդելը գրեթե անհնար է, սակայն ներկայումս ստուգումներ են կատարվում: