Ծիծաղում է նա, ով վերջում է ծիծաղում

Առաջիկայում ադրբեջանական կողմը դիպուկահարներին դուրս չի բերի առաջին գծից: Այս համոզմունքն ունի ռազմական հոգեբան Դավիթ Ջամալյանը` նշելով, որ դրա վերաբերյալ հայկական կողմի հորդորները Ադրբեջանի արտգործնախարար Մամեդյարովի ծիծաղն էին առաջ բերել:

«Ես վստահ եմ, որ մեր հորդորներն իրենց հիմքում ունեն մարտունակ բանակ: Եթե նա երկար ծիծաղի եւ շարունակի իրեն հանդուգն պահել, ստիպված կլինի համակերպվել այն մտքի հետ, որ իրենք շատ ավելի մեծ գին են վճարում դիպուկահարների պատերազմում»,- ասաց Դ. Ջամալյանը:

Ըստ հոգեբանի` դիպուկահարների այս պատերազմը ռազմական նպատակներ չունի եւ ռազմական որեւէ խնդիր չի լուծում: Այն պարզապես հոգեբանական ճնշում գործադրելու միջոց է, ինչպիսին էին նաեւ անցյալ տարի դիվերսիոն խմբերի հարձակումները:

Այս ճնշումն ուղղված է հասարակության շարքային անդամներին, որոնց համոզում են, թե խաղաղ ապրելու միակ երաշխիքը Արցախը հանձնելն է: