Նիկոլն ու Սասունը ազատ կարձակվեն

Համաներումը կտարածվի Նիկոլ Փաշինյանի եւ Սասուն Միքայելյանի վրա: ՀՀ արդարադատության նախարար Հրայր Թովմասյանը խորհուրդ է տալիս «մտավարժանքների մեջ չընկնել», իսկ մամուլում այդ մասին եղած մեկնաբանությունները համարում է անգրագիտություն:

Նա այսօր լրագրողներին տեղեկացրեց, որ համաներման մասին որոշումը ուժի մեջ կմտնի հրապարակվելուց հետո` 24 ժամվա ընթացքում: Համաներման գործընթացը կտեւի մինչեւ սեպտեմբերի 21-ը, եւ դա, ըստ նախարարի,  խորհրդանշական է` սկիզբը` Առաջին հանրապետության օրը, ավարտը` Հայաստանի անկախության օրը:

Անդրադառնալով հարցին, թե արդյո՞ք մինչեւ ՀԱԿ-ի հերթական հանրահավաքը Սասուն Միքայելյանն ու Նիկոլ Փաշինյանն ազատ կարձակվեն, նախարարը նշեց, որ իրենք ամեն ինչ անելու են` օր առաջ բոլորին ազատ արձակելու համար, քանի որ «ցանկացած ձգձգում իր մեջ կոռուպցիոն ռիսկեր է պարունակելու»:

«Նույնիսկ այդ մարդիկ են որոշ դեպքերում պատրաստ լինելու` գնալ այդ քայլին` մեկ ամիս կամ երկու ամիս շուտ դուրս գալու համար»,- ասաց Հրայր Թովմասյանը: