Մեղադրում են նախկիններին

Այսօր ԱԺ նախագահ Հովիկ Աբրահամյանը տեղեկացրեց, որ կառավարության պատասխանատվության մասին ՀՅԴ ներկայացրած հարցապնդումը կքննարկվի վաղը`մայիսի 25-ին:

Խմբակցությունն արդեն կառավարությունից ստացել է հարցապնդման պատասխանը: Հարցապնդումներից մեկը վերաբերում է նրան, թե, բացի ֆինանսատնտեսական ճգնաժամից, էլ ինչո՞վ է կառավարությունը բացատրում Ազգային ժողովի կողմից հավանության արժանացած` կառավարության գործունեության ծրագրի, ինչպես նաև իր իսկ կողմից հաստատված փաստաթղթերի ձախողումները:

Կառավարությունից պատասխանել են, որ մինչ ճգնաժամը մեր երկրի տնտեսական համակարգն արդեն իսկ կուտակել էր արտաքին ցնցումներին դիմակայելու թույլ կարողություններ, և տնտեսությունում կար ճշգրտումների զգալի պահանջ, իսկ ճգնաժամն ուղղակի արագացրեց այդ գործընթացները:

«Կարող ենք փաստել, որ հիմնական ազդեցությունը սոցիալ-տնտեսական ցուցանիշների վրա եղել են ճգնաժամը և նախկինից ժառանգված արտաքին ցնցումների նկատմամբ խիստ զգայուն տնտեսական համակարգը, ինչպես նաև ոչ արդյունավետ սոցիալական ենթակառուցվածքները, որոնց շտկմանը ձեռնամուխ է եղել կառավարությունը»,- ասված է խմբակցության ստացած պատասխանում:

Պատասխանից կարելի է ենթադրել, որ, նախկիններ ասելով, կառավարությունը երկրում տիրող սոցիալ-տնտեսական ծանր վիճակի համար մեղադրում է  Սերժ Սարգսյանի և Անդրանիկ Մարգարյանի կառավարություններին: